15 qyrkúıek kúni «Qallekı teatrynda» óner meıramy. XXXIII teatr maýsymynyń jumysyn bastaýǵa saqadaı saı ujym jyldaǵy dástúr boıynsha M.Áýezovtiń «Abaı» qoıylymyn teatrmen saǵyna qaýyshqan kórermenine tartý etedi.
Qazaqstannyń eńbek sińirgen qaıratkeri, rejısser Álimbek Orazbekov sahnalaǵan «Abaı» tragedııasynda qos Abaıdyń beınesi kórsetiledi. Aǵa Abaı beınesin – Qazaqstannyń halyq ártisi Tilektes Meıramov, Abaı rólin – Qazaqstannyń eńbek sińirgen qaıratkeri Nurken О́teýil somdaıdy.
Qoıylymǵa jalpy 65 akter qatysady. Qoıýshy sýretshi – Qanat Maqsutov. Hormeıster – Qazaqstannyń eńbek sińirgen qaıratkeri Amantaı Jumashev.
«40 jastan asqan sońǵy Abaı bizge bir Abaı emes, eki Abaı bolyp ketedi. Bireýi – ómirge úıleskisi kelmeı, zamannan, ortasynan ozyp shyǵyp, synshy, ustaz, aqylshy, aqyn-danyshpan bolýǵa aınalǵan Abaı da, ekinshisi – kúndegi ómirdiń betimen eldiń sózin ustap, burynǵysha partııa, tartystyń, bılik, ákimshiliktiń jolyndaǵy rý basy, el meńgerýshi Abaı», deıdi uly Muhtar Áýezov.
Ǵasyrlar boıy qalyptasqan kertartpa ádet-ǵuryp pen mylqaý kúsh, dúleı zamandy aıyptap ótken Abaı oıy, Abaı fılosofııasy órkendep, ǵalamdyq deńgeıge jetýiniń barysyndaǵy oqıǵalar sahnada uly M.Áýezov dramatýrgııasymen ótken ǵasyrǵa jol tartqanymen, búgingi kórermen úshin de kókeıkestiligin joǵaltqan joq.
Maýsymashar qoıylym sonymen qatar qyrkúıek aıynyń 19-24 kúnderi aralyǵynda Qaraǵandy qalasynda Qalıbek Qýanyshbaevtyń 130 jyldyǵyna arnalǵan «Syn – shyn bolsyn» respýblıkalyq teatr festıvali aıasynda qaraǵandylyq kórermen nazaryna usynylady. Aıtýly festıval shymyldyǵy Qallekı teatrynyń «Abaı» qoıylymynyń arnaıy kórsetilimimen ashylady.
Sebebi óner ujymy esimin enshilegen teatr óneriniń korıfeıi Qalıbek Qýanyshbaev somdaǵan shoqtyǵy bıik ról – dál osy Abaı róli boldy. Zamandastary Qallekı atap ketken áıgili ártistiń aıtýly rólin týyndy avtory, jazýshy Muhtar Áýezovtiń ózi joǵary baǵalaǵan. 1993 jyly belgili teatr synshysy Áshirbek Syǵaıdyń usynysymen Qalıbek Qýanyshbaevtyń 100 jyldyǵy qurmetine oraı elordalyq teatrǵa «Qalıbek Qýanyshbaev» esimi berildi.
Teatr jańalyǵy munymen taýsylmaıdy. 25-30 qyrkúıek aralyǵynda óner ujymy máskeýlik jas rejısser Gúlnaz Balpeıisovanyń rejısserlik qoltańbasynda qoıylǵan Ǵ.Músirepovtiń «Baıan sulý – Qozy Kórpesh» mýzykalyq dramasymen Bishkek qalasynda ótetin KSRO halyq ártisi Báken Qydykeevanyń 100 jyldyǵyna arnalǵan «ART-ORDO – 2023» IX Halyqaralyq teatr festıvaline qatysady.
Odan bólek, qazan aıynyń 9-15 kúnderi aralyǵynda Petropavl qalasynda Q.Qýanyshbaev atyndaǵy memlekettik akademııalyq qazaq mýzykalyq drama teatrynyń uıymdastyrýymen jáne Soltústik Qazaqstan oblysy ákimdiginiń qoldaýymen Qazaqstan drama teatrlarynyń XXIX respýblıkalyq festıvali ótedi. Festıval memleket jáne qoǵam qaıratkeri Temirbek Júrgenovtiń 125 jyldyǵyn merekeleý aıasynda ótkiziledi.
Sonymen qatar jańa maýsymnyń alǵashqy aılarynda kórermen nazaryna «Qyz Jibek», «Patsha kóńilim, ne deısiń?» qoıylymdarynyń premerasy usynylady. J.Shaıhıslamulynyń «Qyz Jibek» qoıylymyn halyqaralyq teatr festıvalderiniń laýreaty, jas rejısser Álibek О́mirbekuly, al Q.Jıenbaıdyń «Patsha kóńilim, ne deısiń?» komedııasyn rejısser, Qazaqstannyń eńbek sińirgen qaıratkeri Nurlan Jumanııazov sahnalaıdy.
