Memleket basshysynyń Joldaýda qoǵamǵa, jalpy el turǵyndaryna aıtqan usynysy da osy – únemshildik der edim. Máselen, úıde mezgilsiz jumsalǵan elektr qýaty, krannan aǵyl-tegil aqqan sý tegin jatqan dúnıedeı kórinedi. Biraq bári de saıyp kelgende ysyraptyq turmystyń sıpaty emes pe? Bıylǵy jazda Jambyl oblysy dıqandarynyń sýǵa zárý bolyp, bul máseleniń tótenshe jaǵdaıǵa deıin jetýi respýblıkanyń túkpir-túkpirindegi ár eldi meken basshylary men turǵyndaryn oılantýy qajet.
Ekinshi másele – bilim salasy. Memleket bilim men ǵylym salasyna qoldaý kórsetip keledi. Bul qoldaý ǵylymdy qarjylandyrýdan, muǵalimderdiń eńbekaqysyn kóterýden, «Jaıly mektep» baǵdarlamasyn bastaýdan kórinis tapty. Joldaýda da bilim berý júıesin reformalaý, onyń ishinde sapaly bilim alý, sondaı-aq qaýipsiz balalyq shaqty qamtamasyz etý máseleleri sóz boldy. Bilim alýdaǵy teńdikti qamtamasyz etý maqsatynda Prezıdent bes jastan asqan balalarǵa arnalǵan «Keleshek» atty biryńǵaı erikti jınaqtaý júıesin engizýdi tapsyrdy. Bul baǵdarlamada memleket tarapynan usynylatyn bastapqy bilim berý kapıtaly, jyl saıynǵy memlekettik syıaqy jáne ınvestısııalyq tabys qarastyrylýǵa tıis. Osy jınaq pen «Ulttyq qor – balalarǵa» jobasynyń qarajaty qosylǵanda jas urpaqtyń sapaly bilim alýyna qolaıly jaǵdaı týdyratynyn kesip aıtty.
Úshinshi – qoǵamdyq sana jáne ult sapasyn kóterý máselesi. Qazaq qoǵamynyń ǵasyrlardan kele jatqan qundylyqtar júıesi qazirgi qoǵamdy tárbıeleýde, mádenıetti óristetýde negizine aınalýy kerek. Bul eskerilse, ásirese jas urpaqtyń otanshyl, bilimpaz, eńbekqor, tártipti, adal, ádil, únemshil ári janashyr bolatynyna daý joq. Sáıkesinshe mundaı azamattar óristep órkendese, egemen Qazaq eliniń alar asýy da asqaq.
Gúlfaırýz QAIYRǴALIEVA,
tarıh ǵylymdarynyń kandıdaty
