Sýretterdi túsirgen Erlan OMAR
Atalǵan sharany ýnıversıtet prorektory Janna Qurmanǵalıeva quttyqtaý sózimen ashyp, úlken is-sharalar ótkizilip turatyn EUÝ elordadaǵy rýhanı ortalyq ekenin aıta kele, búgin ýnıversıtette erekshe shara ótip jatqanyn tilge tıek etti.
«Kenjebolat Joldybaı ómirboıy ishki saıasat salasynda, aqparat salasynda qyzmet etti. Kitapty shyǵarǵan aǵamyzdyń otbasyna ýnıversıtet atynan úlken rızashylyǵymyzdy bildiremiz. Aǵamyz adal azamat edi, sol kisi sekildi adal azamattar elimizde kóp bolsyn», dedi Janna Dýlatqyzy.
Kitaptyń tanystyrylymyn uıymdastyrýǵa qoldaý bildirgen Bas redaktorlar klýbynyń prezıdenti, Parlament Senatynyń depýtaty, Ulttyq Quryltaı tóraǵasynyń orynbasary, jýrnalıst Bıbigúl Jeksenbaı: «Kenjebolat Mahmutulymen 2014 jyldan bastap etene jumys istedik. Elimizde azamattyq ınstıtýttyń qalyptasýyna K.Mahmutulynyń zor yqpaly boldy. Kez-kelgen qoǵamnyń damýyna azamattyq qoǵamnyń damýy úlken áser etedi. Osy baǵyttaǵy eń alǵashqy qadamdar Bas redaktorlar klýbynan erekshe kórine bastady. Ol kisi redaktorlar klýbyn basqarǵan kezeńde kóptegen ıgi bastamalardy kóterdi. BAQ týraly zańdardaǵy ózgeristerdiń ómirge kelýine septigi tıip, ótkir pikirler men oılardy aıta bildi. Qoǵamdaǵy ózekti máselelerdi klýbtyń atynan da, óziniń jeke atynan da erkin aıtty. Orys tildi aýdıtorııaǵa da óz oılaryn jetkize aldy. Halyqaralyq sharalardy uıymdastyrýǵa belsene aralasty, ártúrli elshiliktermen jumys isteýge, konferensııalardyń uıymdastyrylýyna atsalysty. Kitapta úlken oılar bar, jýrnalıstıkada oqıtyn stýdentterge zor múmkindikter ashylady dep oılaımyn», dedi.
EUÝ-niń jýrnalıstıka jáne saıasattaný fakýltetiniń dekany, professor, belgili alashtanýshy ǵalym Qaırat О́mirbaıuly Bas redaktorlar klýby men EUÝ-niń jýrnalıstıka jáne saıasattaný fakýltetteri arasynda tyǵyz baılanysty alǵash ornatqan K.Mahmutuly ekenin atap ótti. «Ǵylymı kitaphanadan Aqseleý Seıdimbek zalyn qalap aldyq, ekeýi rýhtas, birin-biri tolyqtyratyn tulǵalar. Marqum artyna «О́lmeıtuǵyn sóz qaldyrdy», dedi alashtanýshy ǵalym.
Jıynda Parlament Senatynyń áleýmettik-mádenı damý jáne ǵylym komıtetiniń tóraǵasy, belgili jýrnalıst, memleket jáne qoǵam qaıratkeri Nurtóre Júsiptiń vıdeo – lebizi tyńdaldy.
«Árkimniń joly – ártúrli sapar» kitabynyń tanystyrylymyna Kenjebolat Joldybaıdyń týǵan jeri Ulytaý oblysynyń ákimi arnaıy hat joldap, lebizin bildirdi. Sonymen qatar Ulytaýdan jýrnalıst, «Ulytaý» teleradıokompanııasynyń kreatıvti dırektory, oblystyq máslıhattyń depýtaty Bazarkúl Seıitjanqyzy arnaıy kelip qatysty.
Basqosýda eks-senator Muhambet Kópeı, fılologııa ǵylymdarynyń doktory, professor Serik Negımov, QR UǴA akademıgi, fılologııa ǵylymdarynyń doktory, professor, «Qazaq gazetteri» JShS Bas dırektory Dıhan Qamzabekuly, jazýshy-dramatýrg, qoǵam qaıratkeri Joltaı Álmashuly, Parlamenttiń eks-depýtaty Ákim Ysqaq, qoǵam qaıratkeri, Ulytaý aýdanynyń qurmetti azamaty Serik Tileýbaev, dintanýshy Iаhııa qajy Ismaılov, «Kazkontent» AQ basqarýshy dırektory Mahat Sadyq, Qazaqstannyń eńbek sińirgen qaıratkeri, Bas redaktorlar klýbynyń múshesi, ǵalym Shahmaran Seıilov sóz sóılep, Kenjebolat Joldybaıdyń atalǵan kitaby týraly oılaryn ortaǵa saldy.
K.Joldybaıdyń kitabynyń shyǵýyna jáne onyń tanystyrylymynyń ótýine sebepshi bolǵan Kenjebolat Mahmutulynyń jubaıy Tóken Qorǵanbekova basqosýǵa qatysýshylarǵa alǵysyn bildirip, atalǵan kitapty mýzeı, kitaphanalarǵa tapsyrǵanyn aıtty.
