Foto: ashyq derekkóz
«Aldaǵy jylý maýsymynyń úzilissiz ótýin qamtamasyz etý maqsatynda mınıstrlik kommýnaldyq, áleýmettik jáne turǵyn úı nysandarynyń daıyndyǵyn sondaı-aq bilim berý nysandarynyń daıyndyǵyn baqylaýǵa aldy. Oqý jyly bastalǵanǵa deıin, ıaǵnı 1 qyrkúıekke deıin barlyq bilim berý nysandary jylytý maýsymyna daıyn bolýy kerek edi. Oblys ákimdikteri taratqan aqparatqa sáıkes, búginde bilim berý nysandarynyń daıyndyǵy 99,6 paıyzdy qurap otyr», dedi Qanat Sharlapaev Úkimet otyrysynda.
Jarııalanǵan málimetterge sáıkes, 8 oblystaǵy 42 bilim berý nysanynda áli de jumys júrgizilip jatyr. Onyń ishinde 24 nysan kúrdeli jóndeýden ótti. Qalǵan nysandar boıynsha jylý júıelerin jóndeý jumystary aıaqtalǵan joq.
Densaýlyq saqtaý nysandary boıynsha daıyndyq 98,9 paıyzdy qurady (jospar – 5607, naqty – 5545). 9 oblystaǵy 62 ýchaskede jumys jalǵasyp jatyr. Jylytý maýsymyna daıyn emes nysandardyń kóbi Abaı oblysynda (28), Aqtóbe (12) jáne Atyraý (6) oblystarynda baıqalady.
«Turǵyn úı keshenine keletin bolsaq, 47 myń turǵyn úıde daıyndyq jumystary aıaqtaldy. Bul júrgizilgen jumystyń 94 paıyzyn quraıdy (jospar – 50 085). 3 myńǵa jýyq turǵyn úı (2993) kúzgi-qysqy kezeńge áli daıyn emes. Daıyndyqtyń tómen kórsetkishi Mańǵystaý oblysynda (891 turǵyn úı), Shymkent (478 turǵyn úı) jáne Almaty (331 turǵyn úı) qalalarynda baıqalady», dedi Qanat Sharlapaev.
Mınıstr bıylǵy jyldyń qyrkúıek aıynyń sońyna deıin ınjenerlik ınfraqurylymdy jóndeý jumystaryn aıaqtaý qajettigin atap ótti. Jalpy respýblıka boıynsha barlyq qarjylandyrý kózderin paıdalana otyryp, 573 shaqyrym jylý jelilerin jóndeý josparlanǵan. Búgingi tańda 498 shaqyrym nemese jospardyń 86,8 paıyzy oryndaldy.
Osy jyly 133 shaqyrym jylý jelilerin qaıta jańartýǵa respýblıkalyq bıýdjetten 109,5 mlrd teńge bólindi (onyń ishinde nysanaly transfertter – 72,4 mlrd teńge, Úkimet rezervi – 36,2 mlrd teńge, bıýdjettik nesıe – 0,9 mlrd teńge).
«Búgingi kúni jumys 78 paıyzǵa oryndaldy, ıaǵnı 103 shaqyrym jylý jelileri tartyldy. Birqatar óńirde jóndeý jumystarynyń qarqyny tómen jáne ýaqytynda aıaqtalmaı qalatyn 10 problemalyq aýmaq bar. Mańǵystaý oblysyna 2 jobany júzege asyrýǵa 3,5 mlrd teńge bólindi (1 joba iske asyrylýda). Búgingi tańda 5,1 shaqyrymdyq josparmen 100 metr ǵana tóseldi. Qubyr ónimderiniń qajetti kólemi joq (jetkizý merzimi 20 qyrkúıek). Soltústik Qazaqstan oblysynda da jaǵdaı osyndaı, Petropavl qalasynda 1 joba (ótpeli) boıynsha 1,3 km josparmen 200 metr tóseldi (jetkizý merzimi 30 qyrkúıek). Sonymen qatar Shyǵys Qazaqstan, Qaraǵandy jáne Qyzylorda oblystarynda 2 joba, sondaı-aq Shymkentte bir joba boıynsha oryndalý 70 paıyzdan tómen», dep túsindirdi Q.Sharlapaev.
Sondaı-aq О́nerkásip jáne qurylys mınıstri joǵaryda atalǵan jobalar boıynsha jóndeý jumystarynyń ýaqtyly aıaqtalmaı qalý qaýpi joǵary ekenin aıtty. Osyǵan baılanysty jergilikti atqarýshy organdar jobalardy aıaqtaý úshin jedel túrde tıimdi sharalar qabyldaýy qajet.
