Foto: JORYQ
On tórtinshi kúnniń qorytyndysy boıynsha komandalardyń jalpy ýaqyty:
Jetisý oblysy – 93 saǵat 47 mınýt 43 sekýnd;
Aqtóbe oblysy – 95 saǵat 06 mınýt 37 sekýnd;
Almaty qalasy – 104 saǵat 23 mınýt 57 sekýnd;
Abaı oblysy – 112 saǵat 12 mınýt 46 sekýnd.
Jeńimpazdardy marapattaý saltanatyna Týrızm jáne sport vıse-mınıstri Sársen Quranbek, «AMANAT» partııasynyń atqarýshy hatshysy Dáýlet Káribek, Ulttyq sport qaýymdastyǵynyń prezıdenti Islambek Saljanov, Túrkistan oblysy ákimi apparatynyń basshysy Erkeǵalı Álimqulov pen «JORYQ» at sporty federasııasynyń prezıdenti Baqytjan Turlybekov arnaıy qatysty.
«Uly dala joryǵy» álemde joq respýblıkalyq marafon báıge. Byltyr bastalǵan bul jobanyń aýqymy keńeıip, el ishinde keńinen qoldaý taýyp keledi.
Keler urpaqqa qasıetti at ustaý men báıge ónerin jetkizý asa jaýapty borysh. Búgingi is-shara osy jolda atqarylyp jatqan naqty istiń biri. О́ıtkeni ol qazirgi jahandaný dáýirindegi ulttyq bolmysymyzdy saqtaýdyń bir joly.
Sol sebepten de Ulttyq sport qaýymdastyǵy 2 jyl qatarynan «Uly dala joryǵy» jobasyna seriktes bolyp, qoldap keledi.
Búginde Prezıdent Qasym-Jomart Kemeluly Toqaevtyń tikeleı nazarynyń arqasynda ulttyq sportqa erekshe kóńil bólinip jatyr. Memleket basshysy keler jyly Astanada ótetin V Dúnıejúzilik kóshpendiler oıynyna da aıryqsha nazar salyp otyr.
«Uly dala joryǵyna» qatysqan shabandozdar kóshpendiler oıynynda olja salady degen senimdemin», dep aıtty óz quttyqtaý sózinde Ulttyq sport qaýymdastyǵynyń prezıdenti Islambek Saljanov.
Sońǵy meje – Túrkistan qalasyna deıin eń qysqa ýaqyt ishinde jetken Jetisý oblysynyń komandasy bas júlde – 18 000 000 teńge (Reglamentke saı) kólemindegi júldemen marapattaldy. Aqtóbe oblysy komandasy 2-shi oryn úshin – 16 000 000 teńge, al 3-shi oryn ıegeri Almaty qalasynyń komandasy 9 000 000 teńgeni qanjyǵasyna baılady. Tóreshiler sheshimimen, márege 4-shi bolyp kelgen Abaı oblysynyń komandasyna 5 000 000 teńge berildi.
Sonymen qatar bul kezeńde Mańǵystaý oblysynyń Adaı jylqysy rekord jasady. «Rekord» komandasyndaǵy 21 jastaǵy Maǵjan Abdoluly 1300 shaqyrymnyń sońǵy 50 shaqyrymyn baǵyndyrýǵa tańǵy saǵat 7:10-da attanyp, Túrkistandaǵy máre syzyǵyn 08 saǵat 44 mınýt 09 sekýndta birinshi bolyp kesti. Astanadan Túrkistanǵa deıingi 1300 shaqyrymdy bastan-aıaq 1 atpen eńserýdi maqsat etken «Rekord» komandasynyń quramy Astana qalasy, Mańǵystaý men Jetisý oblystarynyń shabandozdarynan quralǵan.
Márege jetisýlyq shabandoz ekinshi bolyp kelse, artynsha astanalyq shabandoz jetip, «Rekord» komandasy dittegen maqsatyn oryndady. 1300 shaqyrymdy 1 atpen baǵyndyrǵan azamattar 1-oryn úshin 2,5 mıllıon teńge, 2-orynǵa - 2 mıllıon teńge, 3-orynǵa - 1,5 mıllıon teńge kólemindegi syıaqy aldy.
«Rekord» komandasynyń nátıjesine toqtalsaq, Mańǵystaý oblysynyń jylqysy 1300 shaqyrymdy 98 saǵat 44 mınýt 47 sekýndta baǵyndyrdy. Al Jetisý oblysynyń tulpary 100 saǵat 04 mınýt 34 sekýndta eńserdi. Úshinshi, astanalyq sáıgúliktiń ýaqyty 104 saǵat 28 mınýt 11 sekýndty quraıdy.
Sonymen birge, komandasy jarystan shyǵyp qalsa da, joryqty óz erkimen jalǵastyryp, 1300 shaqyrymdy jeke dara baǵyndyrǵan 10 shabandozdyń árqaısysyna tóreshiler sheshimimen 1 mıllıon teńge kólemindegi qarjylaı syılyq berildi.
Eki aptalyq alamanǵa qatysyp, attyly shabandozdarmen birge 1 300 shaqyrymdy baǵyndyrǵan Beıneý aýdanynyń týmasy, Qazaqstannyń qurmetti qurylysshysy, elge belgili veloshabandoz Rabbım Borashovqa da tóreshiler «Eń úzdik jankúıer» nomınasııasyn belgilip, 1 000 000 teńge kóleminde qarjylaı syılyq taǵaıyndaldy. Mańǵystaýdyń «Kókmoınaq» komandasyna jankúıer veloshabandoz buǵan deıingi marafon-báıgege qatysyp, Túrkistanǵa deıingi 1 200 shaqyrymdy baǵyndyrǵan edi.
Jalpy 5-19 qyrkúıek aralyǵynda marafonshylar elordadan Túrkistan qalasyna deıin 1300 shaqyrymnan asa qashyqtyqty basyp ótti. Marafon 14 satyǵa bólindi. Elimizdiń 19 óńirinen marafonǵa 1 komandadan qatysty. Marafonǵa qatysýshylarǵa Uly Dala rýhyn sezinýge jáne kıeli jerlerimiz – Joshy han, Alasha han keseneleri, túrki rýhanııatynyń besigi Túrkistan qalasy sııaqty tarıhı oryndarǵa zııarat jasaýǵa múmkindik týdy.
Aıta keteıik, «Uly dala joryǵy» marafon-báıgesi respýblıkalyq «JORYQ» at sporty federasııasynyń, Týrızm jáne sport mınıstrliginiń uıymdastyrýymen, «AMANAT» partııasynyń jáne Ulttyq sport qaýymdastyǵynyń qoldaýymen ótti.
Al, marafon-báıgeniń Bas seriktesi – «Sport Qory» týrızm ındýstrııasy men sportty qoldaý qory.
