Bul vagondardy Petropavl qalasyndaǵy otandyq «ZIKSTO» zaýyty jasap shyǵardy. Elordaǵa zamanaýı úlgide jasalǵan plaskart jáne kýpe vagondarynyń birinshi partııasy da jetkizildi. Bul vagondar «Qaraǵandy – Jezqazǵan», «Atyraý – Mańǵystaý», «Atyraý – Aqtóbe» baǵyttary boıynsha júretin poıyzdar quramynda jolǵa shyǵady.
Jolaýshylar saparynyń jaılylyǵyn qamtamasyz etý úshin vagondar aýany baptaý qondyrǵysy, tazartý súzgileri, tútin sezbegi, bıodárethanalarmen, tambýrlardaǵy beınebaqylaý júıesimen jabdyqtalǵan. Ár kýpede elektr kózi men USB qosqyshtary da qarastyrylyp otyr. Tıisti nusqaýlyq boıynsha paıdalana bilsek, vagondardyń qyzmet etý merzimi 40 jylǵa deıin jaramdy. Jaılylyǵy men tehnıkalyq ólshemderi jaǵynan anaý-mynaý sheteldik básekelesterin shań qaptyryp ketetin otandyq vagondar óndirisi munymen shektelmek emes.
Aldaǵy qazan aıynyń sońyna taman «ZIKSTO» zaýyty ulttyq tasymaldaýshyǵa taǵy da 50 vagondy, al kelesi jyldyń basynda taǵy 100 jolaýshy vagonyn paıdalanýǵa berýdi josparlap otyr. Sondaı-aq 2030 jylǵa deıin «Stadler» kompanııasynan 537 joǵary tehnologııalyq vagon satyp alý kózdelip otyr. Sonyń arqasynda saldyrlap, qańqasyn ázer súıretip júrgen kónetoz vagondardyń birazymen qosh aıtysamyz.
Tasymal parkin jańartý boıynsha barlyq josparlanǵan is-sharany eskere otyryp, 2030 jyly vagondardyń ortasha shyqqan jyly 18-den 13-ke deıin tómendeıdi dep josparlanyp otyr. Bul rette vagondardyń aýany baptaý júıesimen qamtamasyz etilýi 100%-dy quraıdy.
Qolda bar málimetterge súıensek, keıingi on jyldyń bederinde kompanııa qaýipsizdik, jaılylyq jáne ekologııalyq tazalyǵy boıynsha zamanaýı halyqaralyq talaptarǵa jaýap beretin 1200-den astam vagon satyp alypty.
