Foto: Úkimettiń baspasóz qyzmeti
Atalǵan is-sharany alǵash ret ótkizip otyrǵan Qazaqstan 2019 jyldan beri «Innopromnyń» turaqty qatysýshysy bolyp keledi, al ótken jyly kórmeniń seriktes eli retinde óz ónimderin usyndy. Kórmeniń negizgi maqsaty – óndiristik kooperasııany damytý, ınvestısııa tartý, saýda yntymaqtastyǵyn keńeıtý jáne ózara tájirıbe almasý.
Otandyq «Innopromnyń» taqyryby – jańa kezeńniń ónerkásiptik strategııalary.
Elordadaǵy EXPO ortalyǵynyń alańynda uıymdastyrylǵan kórmege EAEO elderinen 300-den astam kásiporyn men kompanııa qatysyp jatyr. Kelýshiler nazaryna metallýrgııa, mashına jasaý, hımııa jáne jeńil ónerkásip, qurylys ındýstrııasy men farmasevtıka salalaryndaǵy ónimderdiń keń assortımenti usynylǵan.
Kórmeni aralaý barysynda Álıhan Smaıylov, Roman Golovchenko, Aqylbek Japarov jáne Mıhaıl Mıshýstınge «TKSh QazOrtalyǵy» AQ» kompanııasynyń, Railways System KZ temirjol mashına jasaý kásiporyndary qaýymdastyǵynyń, otandyq aýyl sharýashylyǵy tehnıkasy, avtomobılder, munaı-gaz, taý-ken jáne medısınalyq tehnıka, elektrotehnıka, baqylaý-ólsheý aspaptary, arnaıy jumys kıimderi, tyńaıtqyshtar t.b. óndirýshileriniń stendteri tanystyryldy. Sonymen qatar úkimetter basshylary nazaryna vırtýaldy shyndyq tehnologııalaryn paıdalana otyryp, ónerkásiptik IT ázirlemeler, aqparattyq júıeler men sıfrlyq ónimder usynyldy.
Aıta keteıik, Qazaqstan EAEO seriktesterimen birlesip ónerkásip salasynda 38 birlesken jobany júzege asyrǵan. Bul rette kooperasııanyń negizgi basymdyqtary tereń óńdeý, barynsha oqshaýlaý, jańa ónim shyǵarý jáne eksporttyq áleýet boldy. Sonymen qatar búgingi tańda taǵy 80 jobany iske asyrý jumystary pysyqtalyp jatyr. Bul Memleket basshysy Qasym-Jomart Toqaevtyń taıaýdaǵy Qazaqstan halqyna Joldaýynda aıtylǵan eldiń ónerkásiptik negizin qalyptastyrý jáne tereń óńdelgen klasterler qurýǵa den qoıý jónindegi tapsyrmalary turǵysynan erekshe mańyzǵa ıe.
Jalpy, sońǵy 5 jylda respýblıkanyń óńdeý ónerkásibindegi ónim kólemi 2,2 esege – 2017 jylǵy 9,4 trln teńgeden 2022 jyly 20,7 trln teńgege deıin ósti.
