Sýretti túsirgen – Erlan OMAR, «EQ»
Prezıdent elimizde ónerkásipti damytý, aýylsharýashylyq ónimderin óndirýdi arttyrý kerek ekendigin únemi aıtyp keledi. Sondaı-aq Memleket basshysy ár Joldaýy saıyn elimiz úshin ádildik pen demokratııanyń orny erekshe ekendigin eske salyp, ony nyǵaıtý jolynda bar kúsh-jigerimizdi jumyldyrý kerek ekendigin alǵa tartady. Bul jolǵy Joldaýda da halyqtyń ál-aýqaty men ómir sapasyn jaqsartýǵa basa nazar aýdarylǵan.
Joldaý júktegen mindetterdi oryndaýda Tasqala aýdany turǵyndary «bir jaǵadan bas, bir jeńnen qol shyǵaryp», aýyzbirshilik tanytýda. Arqaǵa artylar júktiń aýyr salmaǵyn sezine otyryp, ilkimdi jospardy iske asyrý jolynda eldegi aǵaıyn esh aıanyp qalmaq emes.
Árıne, kerek kásiptiń kózin taýyp dóńgelentip otyrǵan kásipker jandarǵa da ońaı emes ekendigi túsinikti. Olardyń aldynda óndiretin et, sút, astyq ónimderin tereń óńdeý mindeti tur. Al bılik «Aýyl amanaty» baǵdarlamasy boıynsha jeńildetilgen nesıe berýdi jandandyrýdy myqtap qolǵa alsa, kásip ashamyn degen turǵyndar arasynda túsinikteme jumystaryn júrgizip, jumyssyz júrgen jastardy kásipkerlikke baýlý jumystaryn jalǵastyrsa, nur ústine nur bolar edi. Sondaı-aq Prezıdent «Aýyl amanaty» baǵdarlamasy boıynsha tek jeńildetilgen nesıe berýmen ǵana shektelmeı, jeke qosalqy sharýashylyq ıelerin biriktirýge baǵyt ustaný kerek», dedi.
Mysaly, bizdiń eldegi Dostyq aýyldyq okrýginde turatyn kásipker Erkebulan Qazıollauly ónim óndirýdi damytý maqsatynda Aqtóbe oblysynan 15 sıyr, 20 qashar satyp alǵan-dy. Al Merlan Isaǵalıev degen azamat memleket tarapynan grant alyp, qazirgi tańda kartop, sábiz, qyryqqabat, qyzylsha, qyzanaq syndy kókónister ósirip, jaqsy nátıjege qol jetkizip jatqandyǵy jóninde jıi aýyzǵa iligedi. Ol jaıynda aýdandyq gazetter de jarysa maqala jarııalap jatyr.
Bıylǵy Joldaý bizdiń aýdanymyzdyń 90 jyldyq toıy qarsańynda jarııalanyp otyr. Biz buǵan óte qýanyshtymyz. Aýdan eńbekkerleri Joldaýda kórsetilgen barlyq máseleni ońynan sheshý jolynda esh aıanyp qalmaq emes. Al munyń ózin aýdan ekonomıkasynyń damýyna qosylǵan qomaqty úles dep baǵalaýǵa tıispiz.
Qoryta aıtqanda, Prezıdent Joldaýynyń basty qaǵıdasy – Ádiletti Qazaqstan jáne Adal azamat uǵymdary qatar júretin qýatty Qazaqstandy qalyptastyrý. Bul degenimiz – elimizdiń bolashaǵy úshin birlese kúsh biriktirip, halyqtyń turmysyn jaqsartyp, ekonomıkalyq tabysty arttyrý. Sondyqtan óz basym bul jolǵy Joldaýdyń mańyzy zor, maqsaty aıqyn dep oılaımyn.
Bısenbaı О́tegenov,
zeınetker, aýdandyq qoǵamdyq
keńes múshesi
Batys Qazaqstan oblysy,
Tasqala aýdany
