Bı padıshasyna qurmet

«Men árqashan aınalamnan talantty adamdardy kórgim keledi. Olar men úshin mereke» dep aǵynan jarylǵan Aıýhanov taǵy bir jazbasynda: «Balet tek óner ǵana emes! Bul – beınet! Bul – eńbek! Bul – tógilgen qan men ter!» dep tebirenipti. Sanaly ǵumyryn bekzat ónermen ushtastyrǵan sheber qazaq balet mektebin bıik shyńǵa kóterip, urpaq tárbıesine eleýli úles qosty.

Kórmeniń ashylý saltanatyna qatys­qan áriptesteri men shákirtteri ony óz isine qulaı berilgen maman, ultyn súıýdiń ulaǵatty úlgisin kórsetken azamat retinde eske aldy. Kúndeligine «Men qazaqty qu­bylys dep esepteımin. Bul – ult degen uǵym­nan da bıik!» dep jazǵan bı sańlaǵy óz hal­qynyń tanym-taǵylymyn, salt-dás­­túrin, rýhanı mektebin aıryqsha baǵa­laǵan.

Qonaqtar óner ıesiniń kórme tórinen oryn alǵan fotoshejiresimen, tirshiliginde tutynǵan jeke zattarymen, sondaı-aq marapattary jáne ǵylymı eńbekterimen tanysty. Ekspozısııanyń eleýli bóligine bıshiniń túrli qoıylymda kıgen sahnalyq kostıýmderi qoıylǵan. Olar­dyń qatarynda Qazaq KSR halyq ártisi A.V.Seleznevke tıesili bolǵan, keıinnen B.Aıýhanovqa syıǵa berilgen sahnalyq kıim, 1965 jyly «Jas balet» teatrynda Kýba bıine arnaıy tigilgen kostıým, Iаn Sıbelıýstyń mýzykasyna jazylǵan «Muńly vals» klassıkalyq bıine kıgen kaletasy jáne «Gamlet» bale­tindegi óziniń súıikti partııasyn oryn­daǵan­da kıgen kostıými kelýshilerdiń zor qyzyǵý­shylyǵyn týdyrdy.

Aıtýly is-sharany ashqan Memlekettik ortalyq mýzeı dırektory Rashıda Ha­rı­pova taǵdyr bergen talantyn el mádenıetin órkendetýge arnaǵan aıtýly tulǵanyń aıshyqty muralary keıingi urpaq úshin ólmes ónege ekenin atady.

Kórme Qazaqstan Respýblıkasy Mem­lekettik ortalyq mýzeıi qoryndaǵy Bolat Aıýhanovtyń jeke kesheninen jáne Memlekettik akademııalyq bı teatrynan alynǵan materıaldar negizinde jasaqtalǵan.

Bolat Ǵazızuly Aıýhanov – 1938 jyly 13 qyrkúıekte Semeı qalasynda dúnıe­ge kelgen. 1955 j. Almaty horeografııa ýchı­lıshesin, 1964 j. A.V.Lýnachar­skıı atyndaǵy Máskeý teatr óneri ıns­tıtýtynyń baletmeısterlik fakýl­tetin támamdaǵan. Alǵashqy eńbek jolyn 1957 j. Abaı atyndaǵy Qazaq Mem­lekettik akademııalyq opera jáne balet teatryn­da balet ártisi bolyp bastaǵan.

1964 j. bastap Abaı atyndaǵy Qazaq mem­lekettik akademııalyq opera jáne balet teatrynda baletmeıster, 1965 jyl­dan «Qazaqkonsert» eki akterli Teatry­nyń balet solısi, al 1967 jyldan «Qazaqkonsert» janyndaǵy Almaty Jas­tar baleti kórkemdik jetekshisi, balet solısi boldy. 1975 j. Qazaqstan klas­sıkalyq bı Ansambliniń kórkemdik jetek­shisi, keıinnen dırektory qyzmetin atqardy. 1991 j. Qazaq memlekettik klas­sıkalyq bı ansambliniń kórkemdik jetek­shisi, 2003 jyldan ómiriniń sońyna deıin ózi negizin qalaǵan Memlekettik aka­demııalyq bı teatrynyń dırektory boldy.

ALMATY