Is-sharaǵa Qarýly Kúshter, Aýǵan soǵysy, Tájik-aýǵan shekarasy qaqtyǵysynyń ardagerleri, jas sarbaz klýbynyń músheleri jáne áskerge attanýshy jastar men olardyń týystary qatysty. Áskerge shaqyrylǵan jigitterdiń kóńil kúıi kóterińki, áskerı boryshyn óteýge saqadaı saı.
«Ásker qatarynda qyzmet etip, Otan aldyndaǵy paryzyn óteýge árbir azamat mindetti. Sebebi týǵan jerdi, eldi, atamekendi qorǵaý – qasıetti borysh. Bul degenimiz – batyrlyq pen tabandylyq, otansúıgishtik pen Otanǵa sheksiz qyzmet etýdiń nyshany. Qashanda halyqtyń uly bolý – árbir azamattyń bıik armany. Ásirese Otan aldyndaǵy boryshyn ótep, ásker qataryna qosylý – naǵyz azamattyqtyń belgisi, qaısarlyqtyń kórinisi. Muny árbir jas jete bilip, sanasyna sińirip ósýge tıis. Qazir álemde saıası ahýal qıyndap barady. Bizge el úshin qalqan bolatyn batyrlar qajet», deıdi Qarýly Kúshter ardageri, zapastaǵy polkovnık Seıitjan Meńdekeev.
Jetisý óńirinde jyldan-jylǵa Otan aldyndaǵy mindetin óteýge asyq jastar kóbeıip keledi. Onyń ústine memleket tarapynan tegin oqýǵa qoldaý kórsetilgenin estigen aýyl jastary burynǵydaı áskerdi keıinge qaldyrmaıdy. Jas sarbazdar shekara áskerleri, Ulttyq ulan jáne eldiń Qarýly Kúshteri qataryn tolyqtyrady. Bir jyl qyzmetin ótip, áskerı bıletin qolyna alady.
«Azamattardy áskerı qyzmetke shaqyrý «Áskerı qyzmet jáne áskerı qyzmetshilerdiń mártebesi týraly» zańnyń 27-babyna sáıkes júrgiziledi. Zańnyń 30-babyna sáıkes áskerı qyzmetke shaqyrylýǵa jatatyn azamattar jergilikti áskerı basqarý organynyń shaqyrý qaǵazy boıynsha shaqyrý komıssııasyna kelýge mindetti. Jyl saıyn shaqyrý kóktem men kúzde júzege asyrylady. Áskerı qyzmettiń merzimdi qyzmetin ótkerýge jatatyn balalar kontıngentin arnaıy komıssııa aıqyndaıdy», deıdi Taldyqorǵan qalasy qorǵanys isteri jónindegi basqarma basshysy Maqsat Qýandyquly.
Áskerge shaqyrylatyn jastarǵa shaqyrý qaǵazdaryn qorǵanys bólimderiniń mamandary tapsyrady. Shaqyrý qaǵazyn azamatqa jeke tapsyrý múmkin bolmaǵan jaǵdaıda, onyń kelýin qamtamasyz etý tıisti ishki ister organyna júkteledi. Ishki ister organdary óz quzyreti sheginde áskerı mindetti oryndaýdan jaltarǵan adamdardy izdestirýge mindetti.
«Bul rette zańnama normalary boıynsha keıinge qaldyrý beriletin azamattardyń sanattary bar. Zańnyń 35-babyna sáıkes áskerı qyzmetke shaqyrýdy keıinge qaldyrý mynadaı negizder boıynsha: otbasylyq mán-jaılar, bilimin jalǵastyrý úshin, densaýlyq jaǵdaıy, basqa da sebeptermen beriledi. Eki áskerge shaqyrý naýqany kezinde, ıaǵnı jyl basynan beri 2500-ge jýyq azamatqa keıinge qaldyrý berildi», dep túsindirdi Taldyqorǵan qalasy qorǵanys isteri jónindegi basqarmasynyń qyzmettik isti uıymdastyrý jáne áskerleri qyzmetiniń basshysy Nursulý Musabaeva.
Qazaqstan Prezıdenti – Qarýly Kúshterdiń Joǵarǵy Bas qolbasshysy Qasym-Jomart Toqaev jastarǵa arnaǵan sózinde Otan qorǵaýdyń qasıetti paryz ekenin únemi aıtyp keledi. El senimdi tiregine úlken úmitin artady. Senimdi aqtaý – azamattyq paryz. Jastardy otansúıgishtikke baýlý, olardy dostyq pen yntymaqqa baǵyttaý, elimizdiń erteńgi beıbit ómiriniń negizi bolmaq.
«Ár azamat Otan aldyndaǵy boryshyn óteýi qajet. Men óz erkimmen ásker qataryna barmaqpyn. Áskerden keıin kelisimshart boıynsha qyzmet isteýge nıetim de bar. Sebebi áskerge barǵan adam tártipke úırenedi. Sondyqtan ásker eń aldymen ishki tártipti qalyptastyryp, jaýapkershilik júgin arqalaı bilýge baýlıdy. Úıdegiler sheshimime qarsy bolǵan joq, qaıta qýana qoldady. Osy salada ózimniń baǵymdy synap kórgim keledi. Bala kúnimnen armanym osy bolatyn. Mine, búgin sol armanyma qol jetkizip turmyn», deıdi áskerge shaqyrylǵan Mıras Daıyrbek.
Jetisý oblysy
