Kollajdy jasaǵan – Záýresh SMAǴUL, «EQ»
Qurylys jáne turǵyn úı, ekologııa, jer qatynastary, kásipkerlik, ekonomıka jáne qarjy, áleýmettik sala, ınfraqurylym men jol – synǵa ilikken salalar sanatynda. Máselen, bıyl kásipkerlik qyzmetke aralasqany úshin 3 laýazymdy tulǵa ákimshilik jaýapkershilikke tartylǵan. Sondaı-aq ruqsat berý tártibi men merzimin buzǵan taǵy 4 tulǵanyń áreketi áshkerelengen. Jemqorlar qoldy qylǵan 9,2 mlrd teńge qaıtarylyp, taǵy 5,4 mlrd teńge kólemindegi qarjy buǵattalǵan.
«О́ńirlik problemalardyń ereksheligin eskere otyryp, agenttik oblys pen respýblıkalyq mańyzy bar qalalar úshin sybaılas jemqorlyq táýekelderiniń kartasyn ázirledi. Kartada úderisterdiń ashyqtyǵyna, ákimshilik kedergilerdiń bolýyna, zańnamanyń jetilmegendigine baılanysty sheshimin tabý múmkin emes ózekti máselelerdiń tizbesi usynylǵan. Ony iske asyrý sheńberinde bıyl sybaılas jemqorlyqqa qarsy 8 monıtorıng jáne sybaılas jemqorlyq táýekelderine 3 syrtqy taldaý júrgizildi. Nátıjesinde, 129 usynys engizilip, 24 tulǵa jaýapkershilikke tartyldy», deıdi Sybaılas jemqorlyqqa qarsy is-qımyl agenttiginiń Almaty qalasy boıynsha departament basshysy Arman Rahımov.
Almatyda 350 myńǵa jýyq shaǵyn jáne orta kásipkerlik sýbektileri tirkelgen. A.Rahımovtiń aıtýynsha, bıznes salasy memlekettik organnyń erekshe baqylaýynda. Kásipkerlerdi qorǵaýǵa baǵyttalǵan «Bıznes jol» jobasy aıasynda bes birdeı kezdesý ótip, oǵan eki myńnan astam kásipker qatysqan. Kásip ıelerin alańdatqan 26 kúrdeli másele ońtaıly sheshim taýyp, barlyǵy alty júz azamattyń quqy qorǵalǵan.
Agenttik iske qosqan «Sybaılas jemqorlyqqa qarsy volonterlik» jobasy birneshe qylmystyń betin ashýǵa sep bolǵan. Zańsyzdyqqa beıjaı qaramaıtyn 100-ge jýyq azamat sybaılas jemqorlyqqa qarsy qyzmetke belsendi qatysýǵa nıet bildiripti. «Sybaılas jemqorlyqqa tózbeýshilik boıynsha qoǵamnyń sanasyn ózgertetin aldyn alý jumystary oń nátıje berip otyr. Buryn halyq para alý faktileri týraly jıi júginetin bolsa, endi memlekettik qyzmetshilerdiń ózderi olarǵa usynylatyn syıaqylar týraly belgi beredi», deıdi A.Rahımov.
Byltyr Almatyda sybaılas jemqorlyqqa qatysty quqyq buzýshylyqtar týraly habarlaǵany úshin 2,6 mln teńge somasynda 13 azamattyń eńbegi qarjylaı baǵalanǵan. Al osy jyly jemqorlyqty anyqtaýǵa kómekteskenderge 520 myń teńge syıaqy tólengen.
ALMATY
