Foto: N.Baıbýlın.
Prezıdent Qasym-Jomart Toqaevtyń bastamasymen iske asyrylyp jatqan reformalardy zańnamalyq turǵyda qamtamasyz etý Senat pen máslıhattardyń birlesken jumysynyń mańyzdy mindeti ekenin atap ótken Máýlen Áshimbaev Memleket basshysy Joldaýda belgilep bergen basym baǵyttarǵa nazar aýdaryp, olardy iske asyrý jolynda áriptesterin birlesip jumys isteýge shaqyrdy.
«О́ńirlerdi damytý jáne máslıhattarmen birlesip ózekti máselelerdi sheshý Senat qyzmetindegi negizgi basymdyqtardyń biri. Qazirgi tańda oblystarda ózekti problemalar az emes. Olardyń basym kópshiligi ınfraqurylymǵa, áleýmettik nysandarǵa, memlekettik baǵdarlamalardyń iske asyrylýyna qatysty. Osyǵan baılanysty Abaı oblysynyń 2027 jylǵa deıingi áleýmettik-ekonomıkalyq damýynyń keshendi jospary bekitildi. Senat osy jáne basqa da bastamalardyń nátıjeli iske asyrylýyna jan-jaqty qoldaý kórsetýge daıyn», dedi Senat Spıkeri.
Sondaı-aq Senat Tóraǵasy barlyq deńgeıdegi depýtattardyń júıeli túrde ózara is-qımyl jasasýy mańyzdy ekenin aıtyp, máslıhat depýtattaryn zań shyǵarý jumysyna tartý qajettigin tilge tıek etti. Palata Spıkeri óńirlerde zańdar men basqa da normatıvtik quqyqtyq aktilerdiń oryndalýyna monıtorıng júrgizý máselesine de erekshe nazar aýdardy.
«Memleket basshysynyń Joldaýda bergen tapsyrmalaryna sáıkes Parlament aldaǵy ýaqytta birqatar zań qabyldaýy qajet. Olardyń qatarynda jańa Salyq, Bıýdjet, Qala qurylysy, Sý kodeksteri bar. Jalpy, jyl basynan beri azamattardyń ómir súrý sapasyn arttyrýǵa arnalǵan kóptegen zań qabyldandy. Bul rette Áleýmettik kodeksti erekshe atap ótýge bolady. Sol arqyly halyqtyń ál-aýqatyn arttyrýǵa arnalǵan jańa áleýmettik tetikter anyqtaldy. Búginde elimizde Prezıdentimiz bekitken ulttyq jobalar iske asyrylyp jatyr. Olar óńirlerge tikeleı qatysy bar qujattar. Osy oraıda zańdar men ulttyq jobalardyń oryndalý barysyn Parlament jáne máslıhattar depýtattary tarapynan júıeli baqylaýdy jolǵa qoıý asa mańyzdy», degen Máýlen Áshimbaev Senat janyndaǵy Jergilikti ókildi organdarmen ózara is-qımyl jasaý jónindegi keńes pen «О́ńir» depýtattyq tobynyń jumysyna toqtaldy.
Senat Spıkeri máslıhat depýtattarymen jáne óńir jurtshylyǵymen kezdesý kezinde Semeıdiń elimiz úshin tarıhı róli men mańyzyna da toqtaldy. Ol oblystyń áleýetin tolyq ashý úshin birlesip áreket etýdiń bereri mol bolaryn aıtty.
«Qasıetti Semeı – halqymyz úshin qashanda orny bólek, qasterli meken. Bul shahar otandyq bilim men ǵylymnyń jáne óner men mádenıettiń tarıhı ortalyǵy. Osy jerde qazaq memlekettiliginiń qalyptasýyna úlken úles qosqan Alash arystarynyń izi men mol murasy qaldy. Sondyqtan Prezıdentimizdiń Abaı oblysyn qurý týraly mańyzdy sheshimi der kezinde jasalǵan jáne óńirdiń damýyna tyń serpin bergen qadam boldy. Aldaǵy ýaqytta oblys jańa qarqynmen damıtynyna senemiz», dedi Máýlen Áshimbaev.
Sonymen qatar Senat Tóraǵasy oıshyl Shákárim Qudaıberdiulynyń 165 jyldyǵyna arnalǵan «Shákárim oqýlary-2023» atty ǵylymı-tájirıbelik konferensııaǵa qatysty. Is-sharada el damýynyń jańa paradıgmasy keńinen talqylandy. Máýlen Áshimbaev Abaı men Shákárim muralary eshqashan ózektiligin joǵaltpaıtynyn, jas urpaqty tárbıeleý jáne ulttyq qundylyqtardy dáripteý isinde eki oıshyldyń ósıetteri qashanda mańyzdy ekenin aıtty.
«Prezıdentimiz Qasym-Jomart Kemeluly Toqaev atap ótkendeı, ulttyń jańa sapasyn qalyptastyrý jolynda kúndelikti ómirlik kózqarastarymyz ózgerýi qajet. Qoǵamda jańa qaǵıdattar men baǵdarlar ornyǵýǵa tıis. Osyndaı rýhanı-ıdeologııalyq mindetti iske asyrý aıasynda biz Shákárimniń murasyna árdaıym oralýǵa jáne ony zerdeleýge mindettimiz», dedi Máýlen Áshimbaev.
Senat Spıkeri sapary aıasynda óńirdiń belsendi jastarymen, múgedektigi bar adamdarǵa arnalǵan abılıtasııa jáne ońaltý ortalyǵynyń ujymymen, sondaı-aq, Shákárim atyndaǵy ýnıversıtet pen Alikhan Bokeihan University-diń oqytýshylarymen kezdesti.
«Jylýkommýnenergo» kásipornynyń qyzmetimen jáne qala bıliginiń shahar ortalyǵyn abattandyrý josparymen de tanysty. Odan bólek, Máýlen Áshimbaev bastaǵan bir top senator Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq mýzeı-qoryǵyna bardy, sondaı-aq, hákimniń eskertkishine gúl shoqtaryn qoıdy.
