Dostyq – Moıynty: Temirjol qurylysy qarqyndy

Atalǵan jobanyń qurylysy «Qýat­ty óńirler – el damýynyń draıveri» ulttyq jobasy aıasynda qolǵa alynǵan. Jalpy, Dostyq júk tasymaly beketinen Moıynty stansasyna deıingi 836 shaqyrymdyq ekinshi temirjol jelisi otandyq ónimniń eksportyn ulǵaıtýǵa jáne eldiń tranzıttik áleýetin artty­rýǵa tikeleı yqpal etpek. Jobaǵa tap­sy­rys berýshi «Samuryq – Qazy­na» ál-aýqat qory bolsa, onyń qu­ry­lys jumy­syn «Integra construction kz» JShS júzege asyrdy.

Mamandardyń aıtýynsha, qury­lys barysynda 5 iri, 87 shaǵyn jáne orta masshtabtaǵy kópir, 288 sý júrgizý qubyry, 14 avtojol ótkeli, sondaı-aq energetıka jáne baılanys nysanyn salý josparlanǵan. Qurylys 2025 jyldyń 4 toqsanynda aıaqtalady. Joba qoldanysqa beril­gende otandyq temirjol tasyma­lynyń qýatyn arttyrýmen birge «Qazaqstan temirjoly júk tasymaly» AQ Almaty bólimshesiniń Dostyq júk tasymaly stansanyń jumysy da qyza túsedi.

«Dostyq júk tasymal stansasy 1991 jyly ashyldy. Búginde Qytaı men Eýropa arasyndaǵy konteınerlik aǵynnyń 70 paıyzy Dostyq stansasy arqyly óte­di. Júktiń kóp bóli­gin «Dostyq Trans termınaly» kon­teı­ner­lik alańy qabyldaıdy. Qazaq­stannyń tranzıttik áleýetin arttyrý – eldiń strategııalyq mindet­teriniń biri jáne biz ony múmkindiginshe iske asyrý úshin bar kúshimizdi salyp jatyrmyz.  О́tken jylǵy júk tasymaly osyǵan deıingi rekordtyq deńgeıge jetip, 23 mıl­lıon 120 myń tonna júk qabyldanyp, óńdelip, jóneltildi. Júktiń negizgi baǵyttary: Qytaı – Eýropa – Qytaı, Qytaı – Ortalyq Azııa elderi, Qytaı – Reseı elin qamtıdy. Jyl basynda bıyl 26 mıllıon 800 tonna júk tasymaldanady dep josparlanǵan. Qazir 15 mıllıon tonnaǵa jýyq júk tasymaldandy. Munyń ishinde Qazaqstannan Qytaı tarapyna 10 mıllıon 700 myń tonna júk tapsyrylsa, Qytaı jaqtan 4 mıllıon 335 myń tonna júk qabyldandy. Al 8 aıdaǵy júk tasymaly ótken jyldyń uqsas mezgilimen salystyrǵanda 119 paıyzǵa artyq oryndaldy. Búgin de Dostyq trans termınaly 13 konteınerlik poıyzdy qurýǵa jáne jóneltýge qaýqarly. Onda 600-den astam adam jumys atqarady. Osy jyldyń 4 toqsanynda júk tasymalynyń tranzıttik áleýe­tin arttyrý baǵytynda eýrostan­dartqa saı termınal ashylmaq. In­fraqurylymyn damytý maqsatynda úlken saıabaq salý josparda tur. Sondaı-aq Qazaqstan men Qytaı tarapy júk ótkizý beketiniń múmkin­digin keńeıtýge baılanysty jańa kelisimder júrgizip jatyr. Ol kelisim júzege assa, jumysymyzǵa serpin bereri anyq. Endi Dostyq – Moıynty temirjol ýchaskesiniń ekinshi jo­lynyń salynýy temirjoldaǵy júk tasymalynyń jyldam ári zama­naýı standartqa saı jumys júr­gizýine yqpal etedi», deıdi Dostyq júk tasymaly stansasynyń basshysy Maqsat Mámbetqulov.

Demek, Dostyq – Moıynty temirjol ýchaskesiniń ekinshi joly Jetisý oblysy aýmaǵynda bıyl jaz aıynda bas­taldy. Jyl sońyna deıin Dostyqtan Saıqan stansasyna deıingi 4 ýchaskege temirjol tóseý josparlanǵan. Qazir Dostyq – Aqshı ýchaskesinde jumys qarqyndy júrip jatqanyn kórdik: «Dostyq pen Moıyntyǵa deıin­gi ár ýchaskede jumys qyzý jú­rip jatyr.  Jetisý óńirindegi  temirjoldy salý mindeti «Integra construction kz» JShS-nyń ońtústik dıreksııasyna tapsyrylǵan. Qazir Aqshı stansasy aýmaǵyndaǵy kirme joldardy tazalaý, jol salynatyn jerdi tegisteý men tas tógý jumysyn atqarý ústindemiz. Osy ýchaskede 120-ǵa jýyq adam jumys atqaryp jatyr. Temirjol qurylysyn júrgizýge qajetti jeńil jáne aýyr tehnıkamen tolyq jabdyqtalǵan. Bıylǵy jos­pardy jyl sońyna deıin tolyq oryndaımyz», deıdi «Integra construction kz» JShS ońtústik dıreksııasy dırektorynyń orynbasary Orynbasar Qulpeıisov.

Bul ýchaskedegi jumysshylardyń bir toby kirme joldardy buryndary tóselgen relsten tazalap jatsa, endi bir bóligi temirjol tóseletin jerge tas tógip, taǵy bir top tehnıkasy ony jaımalap, shyńdap, jantalas jumys júrip jatyr. Qurylys jumysyna jergilikti turǵyndar tartylypty. Olardyń aılyq tabysy da jaqsy. Erteńgi kúni el áleýetin ósirýge jumys atqaratyn jańa joba búginde jergilikti jurttyń ál-aýqatyn arttyryp jatqanyn kórdik.

Jetisý oblysy