Shóppen aınalysatyn sharýalar jańbyrdyń az jaýǵanyn alǵa tartyp, qymbatshylyqqa sebep aıtýda. Al keıbir eldi mekende shópke shalǵy óte kesh tıdi. Buryndary shildeniń basynda-aq ekinshi oramdy bastap ketetin sharýalar, mine, kúz ortasyna kelgende ǵana úshinshi oramǵa daıyndalyp jatyr. Osydan-aq jemshóptiń qysta tapshy bolaryn baǵamdaı berýge bolady. Máselen, Sarqan aýdanyna qarasty Qarabóget aýylynyń fermerleri jazdyń aptap ystyǵynan kóterile almaǵan shabyndyqtyń esesin egistik alqabynan alýdy oılap otyr. Sol sebepti aýdanda maıburshaq pen arpa sabandaryn orap, túkteýde.
Máselen, qazir bir túk jońyshqa 1500-1800 aralyǵynda bolsa, aıdyń aıaǵy 2 myń teńgege tappaısyz. Tipti qamys shóptiń de baǵasy ushyp barady. Al byltyr júgeriniń baǵasy sýlylyǵyna qaraı kg 80-90 teńgeden, bıyl da sol shamalas. Al bıdaıdyń baǵasy sharýalarǵa tipti qolaısyz bolyp tur.
Jetisý oblystyq aýyl sharýashylyǵy basqarmasynyń bizge bergen aqparattaryna súıensek, 2023 – 2024 jylǵy qysqy naýqanǵa mal azyǵynyń qosymsha qory eskerilip, aýdan jáne qala ákimdikterine 2 205,5 myń tonna mal azyǵyn daıyndalyp jatyr. Onyń ishinde shóp – 1 236,7 myń tonna, pishindeme – 116,7 myń tonna, súrlem – 203,4 myń tonna, saban – 184,7 myń tonna, jem 241,9 myń tonna qajet. Qazirgi tańda atalǵan tapsyrmanyń oryndalýy aýdan jáne qala ákimdikteriniń aqparattaryna sáıkes qajettiliktiń 88,5 paıyzy nemese 1 953,5 myń tonna mal azyǵy jınalǵan. Atap aıtsaq, Aqsýda – 220,0 myń tonna, Alakólde – 183,3 myń tonna, Eskeldide – 96,4 myń tonna, Qaratalda – 89,0 myń tonna, Kerbulaqta – 167,5 myń tonna, Kóksýda – 112,5 myń tonna, Panfılovta – 203,4 myń tonna, Sarqanda – 130,0 myń tonna, Taldyqorǵanda – 25,2 myń tonna, Tekelide 7,1 myń tonna mal azyǵy bar. Árıne, bul óte az. Az deıtin sebebimiz, bıyl mal qystatý naýqanyna azyqtyń qajettiligi 3 mln tonnaǵa deıin barýy múmkin. Sebebi qystyń byltyrǵydaı minez kórsetýi ǵajap emes. Qazir jemshóp daıyndaý jalǵasýda jáne turaqty baqylaýda. Dál qazir óńirde shamamen 559,6 myń iri qara, 1 769,5 myń usaq mal, 189,8 myń jylqy bar.
