Depýtat eldegi teris ıslamdyq salafıttik aǵym ulttyq jáne memlekettik múddege qater tóndirip turǵany týraly ótken aptada joldanǵan depýtattyq saýaldar erikkenniń ermegi emes ekenin aıtyp, Qazaqstan qoǵamyna deńdep enip bara jatqan túrli «ızmderdiń» aldyn alý úshin jandármen azamattyq alańdaýshylyqtan týyndaǵan áreket ekenin aıtty.
«Memleketimizdiń tutastyǵy men qasterli dilin, urpaǵymyzdyń bolashaǵyn qaterge baılap bere almaımyz. Biz ulttyq qadir-qasıetimizdi saqtaımyz desek, memlekettiń ishine iritki salǵan jat dinı aǵymdy sanadan da, aýyl-qaladan da qýyp shyǵýǵa mindettimiz. Biraq depýtattardyń dabylyn «Islam dinine qarsy shyqty» dep áldekimder áleýmettik jelide óńin aınaldyryp, dabyra salyp júr. Eskerteıin, biz Islamǵa, eldegi Ábý Hanıfa máshabyna qarsy emespiz, salafızm-ýahabızm salasyna qarsymyz», dedi Ermurat Bapı.
Premer-mınıstrdiń orynbasary Tamara Dúısenova depýtattardyń usynystaryn qoldaıtynyn jetkizdi.
«Tamyz aıynan beri osy máselemen shuǵyldanýdy bastap, teologtardy, dinı birlestikter ókilderin shaqyrdym. Olardyń da oılary sizdermen mazmundas, usynystardy olar da qoldap otyr», degen vıse–premer T.Dúısenova: «Birinshiden, áleýmettik jelilerde ártúrli dinderdi nasıhattaıtyn kontentterge tosqaýyl qoıa almaı otyrmyz. Ekinshiden, bizdiń qoǵamda dinı saýattylyqtyń tómendigi aıqyn baıqalyp otyr. Tipti, memlekettik organdarda osy jumystardy retteıtin uıymdarda hám uıymdastyrý jumystarynda áli shalalyqtar bar. Mekteptegi hıdjab máselesinde memlekettik organdardyń tolyq jaýap bermeýi úlken pikir-talasqa alyp keldi», dedi.
Onyń sózinshe, zańǵa ózgerister engiziledi. Zerdeleý barysynda shetel tájirıbeleri de saralanǵan.
«Búginde bul úlken máselege aınalyp otyr. Saýd Arabııasynyń ózinde de dinı birlestikterdi memlekettik retteý fýnksııalary kúsheıtilip jatyr. Zańǵa ózgeris engizý kerek. Memlekettiń zaıyrly qaǵıdattaryn nyǵaıtý jáne dinı birlestikterdiń memlekettik retteý máselelerin kúsheıtýge ózgeris engizýimiz qajet», dedi Tamara Dúısenova.
