Infografıkany jasaǵan – Záýresh SMAǴUL, «EQ»
2025 jylǵa deıin jyl saıyn keminde 10 myń jasty jumysqa ornalastyrý kózdelgen. Almaty qalasy Jastar saıasaty basqarmasy basshysynyń mindetin atqarýshy Ázız Qajdenbek ol úshin vedomstvo úsh naqty baǵyt boıynsha jumys júrgizip jatqanyn málimdedi. Bul – oqytý jáne jumysqa ornalastyrý, arnaıy ınfraqurylym qurý, sondaı-aq NEET jastardy mádenı, sporttyq, tanymdyq is-sharalarǵa tartý. Osy baǵytta arnaıy jol karta ázirlengen.
«Biz joǵary oqý oryndaryn, kolledjderdi jáne iri kompanııalardy tarta otyryp, jańa keshendi tásildi qoldandyq. «HedHanter.kz», «OLH.kz», «Naımı.kz» platforma derekterin taldaý negizinde ózekti mamandyqtar boıynsha qysqa merzimdi 30 oqytý kýrsy iske qosyldy. Olar satý jónindegi menedjer, mobılograf, SMM-menedjer, grafıkalyq dızaıner, targetolog, gıd, kýrer jáne basqa da salalar. «Bir tereze» qaǵıdaty boıynsha qysqa merzimdi oqytý ortalyǵyn qurý jastarǵa bıýrokratııalyq satylardan ótýdi jeńildetip, jumysqa ornalasqandardyń úlesin arttyrýǵa múmkindik berip otyr», deıdi Á.Qajdenbek.
Basqarma bergen málimetke sensek, jyl basynan beri arnaıy kýrstan ótken 6 myń jastyń 4,2 myńy jumysqa ornalasyp, birqatary taǵylymdamadan ótip jatyr. Al 2 myńnan astam azamat áli de jumyssyzdar sanatynda. Bıylǵy qazan aıynyń ekinshi onkúndiginde ózekti mamandyqtar boıynsha qosymsha 10 kýrs iske qosylyp, onda shamamen 3 myń jas sheberlikterin shyńdamaq.
Mamandar oqytý kýrstaryn sıfrlandyrý jumystary iske asa bastaǵanyn aıtady. Jyl sońyna deıin barlyq kýrstardan onlaın ótý múmkindigi týmaq. Bul óz kezeginde aldaǵy jyldary jastardy oqytýǵa bıýdjet qarajatyn únemdeýge septigin tıgizbek.
Taǵy bir jańashyldyq – «Jobfair365» jumyspen qamtý platformasymen birlesip «Jasalmaty.kz» portalyn qurý. Platformanyń basqa uqsas quraldardan ereksheligi – aqysyz negizde jumys izdep, sertıfıkat alý arqyly qysqa merzimdi kýrstardan ótýge bolady. Biriktirilgen bul bastama jumysqa ornalasý jáne oqý úderisin aıtarlyqtaı jeńildetpek. Qazirgi tańda portalǵa 3,7 myń bos jumys orny engizilip, 1,5 myń jumys berýshi tirkelgen.
«Aqpan aıynda biz qalalyq mansap ortalyǵyn ashtyq. Eger buryn mansap ortalyqtary ár oqý ornynda bólek jumys istese, qazir olar biriktirilgen. Bul bir alańda jumys berýshilermen, jumyspen qamtý ortalyqtarymen jáne basqa qurylymdarmen is-áreketti úılestirýge múmkindik beredi. Jyl basynan beri qala aýdandarynda 26 myń adamdy, onyń ishinde NEET sanatyndaǵy jastardy qamtyǵan mansap kúnderi ótkizildi. Jeke bastamalar aıasynda shaǵyn jáne orta bıznes sýbektileri 20,8 myńnan astam jasty, onyń ishinde NEET sanatyndaǵy jastardy jumysqa ornalastyrdy. Sondaı-aq kásipkerlikti damytý jónindegi ulttyq joba iske asyrylyp keledi. Bul baǵytta 6,5 myń jas jumysqa ornalasqan bolsa, onyń ishinde NEET jastary da bar. Sonymen qatar «Jasyl el» jobasy aıasynda 2,1 myń azamat eńbekke tartyldy. Osylaısha, jyl basynan beri NEET jastardy qosqanda barlyǵy 27,4 myń jas jumysqa ornalasty», deıdi Á.Qajdenbek.
Joǵaryda atap ótken jol kartasy negizinde jyl sońyna deıin qalada 8 jastar komýnıtı-ortalyǵy ashylmaq. 2025 jyldyń sońyna deıin olardyń sanyn 16-ǵa jetkizý kózdelgen. Qalada qazir «Ońaı» kartasynyń bazasynda kommýnaldyq ortalyqtardyń rezıdentteri úshin klýbtyq kartochkalyq júıeni iske qosý boıynsha kelissózder júrgizilip jatyr. Karta kólikke, qoǵamdyq tamaqtanýǵa, sporttyq jáne mádenı ınfraqurylymdy paıdalanýǵa jeńildikter beredi. Búginde megapolıste bos ýaqytty paıdaly jumsaýǵa, qosymsha daǵdylardy qalyptastyrýǵa, kásiptik baǵdarlaýǵa jáne jastarda táýeldiliktiń aldyn alýǵa baǵyttalǵan 100 bos ýaqyt ótkizý ortalyǵy jumys istep tur. Keler jyly mundaı ortalyqtardyń birazyn qaıta jańǵyrtý josparlanǵan.
Almatyda jyl saıyn myńnan astam mádenı, sporttyq is-shara ótedi. Eger buryn olar jastardyń jalpy sanyna baǵdarlanǵan bolsa, qazir NEET sanatyndaǵy jastarǵa tikeleı baǵyttalǵan is-sharalar iske qosylǵan. «Joǵaryda atalǵan is-sharalar kesheni Almaty qalasyndaǵy NEET jastardyń úlesin 2023 jyldyń I jartyjyldyǵynda 8,3 paıyzdan (53,8 myń) 7,4 paıyzǵa (47,8 myń) deıin tómendetýge múmkindik berdi, al osy jyldyń sońyna qaraı – 6,5, 2025 jyldyń sońyna qaraı – 5,2 jáne 2030 jyldyń sońyna qaraı 4 paıyzǵa deıin qysqartý josparlanyp otyr», deıdi Jastar saıasaty basqarmasyndaǵylar.
ALMATY
