Qazaq orkestri – Astana fılarmonııasynyń 1996 jyly qurylǵan shyǵarmashylyq ujymy. 2008 jyldan bastap orkestrdiń kórkemdik jetekshisi ári bas dırıjeri – Qazaqstannyń eńbek sińirgen qaıratkeri, «Parasat» ordeniniń ıegeri Aıtqalı Jaıymov.
«Astana – óner ordasy» baǵdarlamasynda maestro Aıtqalı Jaıymov pen orkestr dırıjeri, Mádenıet qaıratkeri Nurlan Bekenovtiń jetekshiligimen Túrkeshtiń «Kóńilashar», Táttimbettiń «Sarjaılaý», Dına Nurpeıisovanyń «Ásemqońyr», Qurmanǵazynyń «Saryarqa», «Serper», Janar Júsipovanyń «Turan», Aıtbaı Muzdahanovtyń «Amankeldi dúbiri», Nurlan Bekenovtiń «Muqalı» shyǵarmalarynyń orkestrlik óńdeýleri oryndaldy. Sonymen qatar kórermen Jorj Bızeniń «Karmen» jáne Volfgang Amadeı Mosarttyń «Fıgaronyń úılený toıy» operalarynan ulttyq aspaptar orkestrine arnalǵan ývertıýralardy tyńdaı aldy.
Vırtýoz mýzykanttar da óz kásibıligin kórsete aldy. Anar Muzdahanova Nurǵısa Tilendıevtiń «Aqqý» kúıin usynsa, Janar Júsipova «Yqylas» kúıin sheberlikpen shertti. Sondaı-aq orkestrmen birge Botagóz Táshimova Edil Qusaıynovtyń «Qypshaq jyry» shyǵarmasyn usyndy. Aıtqalı Jaıymovtyń «Otpan taý» kúıin halyqaralyq baıqaýlardyń laýreaty Qaırat Jumaǵalıev oryndady.
Osy keshte fılarmonııanyń akademııalyq vokal bóliminiń ártisteri de sahnaǵa shyqty. Talǵat Allabırınov orkestrmen birge Abaıdyń «Aıttym sálem, Qalamqas» jáne Dı Kapýanyń «O, sole mio» ánderin shyrqady. Al Altynbek Ábilda Sydyq Muhamedjanovtyń «Aısulý» operasynan Serke kavatınasy men Erkeǵalı Rahmadıevtiń «Bala ǵashyq» týyndysyn pash etti. Halyqaralyq baıqaýlardyń laýreaty Fırýza Rahmetova Qazaq orkestrimen birge Lýıdjı Ardıtıdiń «Poselýem» jáne Latıf Hamıdıdiń «Bulbul» shyǵarmalaryn oryndap, erekshe áser qaldyrdy. Kesh sońynda oryndaýshylar Arman Jaıymnyń «Qazaq eli» jáne Ermurat Úsenovtiń «Astana» ánderimen konserttik baǵdarlamany aıaqtady.
