Sýretti túsirgen – Rýslan Kadyrov
Bul – óńirdegi dárigerlerdiń bedelin arttyryp qana qoımaı, qarapaıym halyqtyń emine járdem bolar mańyzdy alǵashqy ortalyq. Ártúrli aýrý-syrqaýdan zapy bolǵan turǵyndardyń shıpasyn tezirek tabýǵa qabiletti. Qazir óńirde medısınalyq-sanıtarlyq kómektiń úzdik tájirıbeleriniń eki ortalyǵy ashyldy. Olardyń jumysy medısınalyq qyzmet kórsetýdiń qoljetimdiligi men sapasyn arttyrýǵa baǵyttalǵan. О́ńir ákimi baspasóz qyzmetiniń málimetinshe, endi óńirdegi eki emhanada pasıentterdiń áleýmettik jaǵdaıyna erekshe basymdyq beriledi. Nege deseńiz, bul ortalyqtar otbasylyq medısına qaǵıdatyn engizýge baǵyttalyp otyr. Birte-birte bul oń tájirıbe búkil oblys kóleminde taratylmaq.
О́ńirdegi alǵashqy medısınalyq-sanıtarlyq kómek kórsetý tájirıbesiniń ortalyǵy Eskeldi aýdanynyń Qarabulaq aýylyndaǵy ortalyq aýdandyq aýrýhana bazasynda, al ekinshisi Taldyqorǵan qalalyq №1 emhananyń 6-shaǵyn aýdandaǵy ǵımaratynda ashyldy.
Oblystyq densaýlyq saqtaý basqarmasynyń basshysy Arman Jansengirov óz quttyqtaý sózinde bul ortalyqtar medısınalyq mekemelerdiń qurylymdyq bólimsheleri bola otyryp, adam densaýlyǵyna qamqorlyq jasaıtyn keshendi medısınalyq, áleýmettik jáne psıhologııalyq kómek berý ortalyqtaryna aınalatynyn atap ótti.
«Densaýlyq salasy boıynsha aýdanda jumys júıeli júrip jatyr. Medısınalyq qyzmettiń jańarýy – bilikti mamandardyń shoǵyrlanýyna, sapaly jumys túrin uıymdastyrýǵa barynsha serpin beredi», dedi A.Jansengirov.
Bul rette mýltıdıssıplınarly top kópsalaly komandadan quralǵan, atap aıtqanda, onyń quramynda otbasylyq dárigerler, patronaj medbıkeleri, akýsherler, áleýmettik qyzmetkerler men psıhologter bar. О́z kezeginde «Astana» medısınalyq ýnıversıteti» AQ Dırektorlar keńesiniń tóraǵasy, «Primary Health Care» ulttyq qaýymdastyǵynyń tóraǵasy Tólebaı Rahypbekov alǵashqy medısınalyq-sanıtarlyq kómekti qaıta qurý kózdelip otyrǵanyn aıtty.
«Bul otbasylyq medısınany damytý men medısınalyq kómektiń sapasyn arttyrý úshin jasalyp otyr. Osyndaı alǵashqy ortalyqty Almaty oblysy Eńbekshiqazaq aýdanynda aýyldyq kópsalaly aýrýhana bazasynda ashqan edik. Dúnıejúzilik densaýlyq saqtaý uıymy bizdiń jobamyzdy Eýropanyń 53 eline álemdegi alǵashqy demonstrasııalyq platforma retinde usyndy. Jalpy, bizdiń qaýymdastyq 2018 jyldan bastap jumys istep keledi. Sondaı-aq biz psıhıkalyq densaýlyq máselelerimen de aınalysamyz. Halyqty mı qan aınalymy buzylysynyń, sút bezi qaterli isiginiń jáne t.b. syrqattardyń alǵashqy belgilerin anyqtaýǵa úıretemiz. Búgin ashylǵan ortalyqtar jemisti jumys isteıdi dep senemiz jáne olardyń tájirıbesi jaqyn arada Jetisý oblysyna keńinen taratylady», dedi T.Rahypbekov.
Osy kúni ortalyqtyń resmı ashylýynan buryn «Primary Health Care» ulttyq qaýymdastyǵynyń sarapshy mamandary dárigerler men medbıkelerge, áleýmettik qyzmetkerler men psıhologterge oqytý trenıngterin ótkizdi.
Jalpy, mundaı úzdik tájirıbe ortalyqtaryn qurýdaǵy negizgi maqsat – medısınalyq kómekti qoljetimdi ete túsý, adam men onyń otbasynyń qajettilikteri úshin densaýlyq saqtaý qyzmetterin ıntegrasııalaý, shaǵymdar sanyn azaıtý, shaǵym túrlerin taldaý, uıymdastyrý jáne ádistemelik jumys júrgizý. Taǵy bir aspektisi – halyqtyń medısınalyq saýattylyq deńgeıin arttyrý, aýrýlardy emdeý jáne aldyn alý úderisine qatysý, halyqtyń densaýlyǵyn qorǵaý salasyndaǵy jobalar men áleýmettik baǵdarlamalardy ázirleý, sondaı-aq dıagnostıkaǵa baǵdarlanǵan tásilden tulǵaǵa baǵdarlanǵan tásilge kóshý.
Ǵımarattyń jalpy aýdany – 100 sharshy metr, 6 bólmeden turady. Táýligine qosalqy stansada aǵa feldsher, aǵa júrgizýshi jáne quramynda 4 feldsher men 4 júrgizýshi bar 4 brıgada jumys isteıdi. Qurylysty júrgizgen – «Qaz damu constrution». Buǵan deıin ákimshiliktiń jertólesinde jumys istep kelgen «Jedel járdem» qyzmetindegiler kólik qoıatyn arnaıy orynǵa deıin oılastyrylǵanyna alǵys bildirdi.
Jalpy, Eskeldi aýdanynda medısına baǵyty boıynsha kóptegen ıgi is júzege asyp jatyr. Máselen, 2021 jyly Bıǵash, 2022 jyly Abaı, Terekti, Qorjymbaı aýyldarynda blokti-modýldi medısınalyq pýnkt ashyldy. Bıyl Bókterli, О́tenaı, Jeńdik aýyldarynda jańa medısınalyq pýnkterdiń qurylysy qarqyn aldy. Al Jetisý aýylyndaǵy ambýlatorııaǵa kúrdeli jóndeý jumysy júrgiziledi.
Jetisý oblysy
