Foto: Aqorda
Memleket basshysynyń aıtýynsha, qazaq-qytaı qatynastary máńgilik ári jan-jaqty strategııalyq seriktestiktiń joǵary deńgeıine jetti. Bul rette el basshylarynyń turaqty kezdesýleri eleýli ról atqardy. О́ıtkeni kelissózder barysynda tatý kórshilik qarym-qatynas pen ózara tıimdi yntymaqtastyqty odan ári nyǵaıtý úshin negiz qalanady.
Qazaqstan Prezıdenti Qytaı Halyq Respýblıkasynyń áleýmettik-ekonomıkalyq progresine jáne Qytaı basshysy júrgizip otyrǵan tıimdi saıasattyń nátıjelerine joǵary baǵa berdi.
«Tóraǵa Sı Szınpınniń kóregen, sarabdal saıasatynyń jáne onyń «Bir beldeý, bir jol» tujyrymdamasynyń tabysty júzege asyp jatqanyna kýá bolyp otyrmyz. Biz, álbette, Qytaıdyń jetistikterine qýanamyz. Búgin Tóraǵa Sı Szınpın forým qatysýshylaryna «Eger Qytaıda bári jaqsy bolsa, barlyq memleket pen halyqtar úshin de jaıly bolady» degen sóz aıtty. Men bul pikirmen kelisemin. Sizdiń elińiz álemdegi ozyq ári jetekshi derjavaǵa aınalýdy kózdegen asqaq muratyna batyl qadam basyp keledi. Tóraǵa Sıdiń dana basshylyǵymen QHR Qytaı eliniń jańa dáýirleý kezeńinde jáne «Adamzattyń ortaq taǵdyry» konsepsııasyn ilgeriletý isinde budan da keremet jetistikterge jetetinine senimdimin», dedi Qasym-Jomart Toqaev.
