Sol kúni oblys ortalyǵynyń irgesindegi Qopa kóli burq-sarq etip aqbas tolqyndary aspanǵa atyp, ashýǵa býlyǵyp jatqan. Ánsheıinde mop-momaqan kóldiń mundaı keıipke túsýi sırek. Soltústik batystan soqqan jel syrly tostaǵandaı shaǵyn kóldi aýdara tóńkerip, sapyra shıryqtyryp, kóbik shashqan sabasyn kúmpildete pisip jatqandaı. Kezekshi bólimniń telefony bezgegi ustaǵandaı qaıta-qaıta shyryldasyn-aı kelip. Sýyt habar. Kúnniń rabaısyz jaısyzdyǵyna qaramaı, kól betine shyqqan qaıyq qaýipke kez bolsa kerek. Habarlaýshylardyń aıtýyna qaraǵanda, úsh adamy bar qaıyq yǵyp bara jatyr. Oblystyq tótenshe jaǵdaılar departamenti órt sóndirý jáne avarııalyq qutqarý jumystary qyzmetiniń bólimshe bastyǵy Rústem Mýjýpov bastaǵan jedel top oqıǵa ornyna birden attanǵan. Kózdi ashyp-jumǵansha kól shetine jetip, motorly qaıyqpen kómekke umtylǵan. Kól sýy muzdaı ári kóz baılanyp kele jatqan ýaqyt. Tolqyn arasynda yǵyp bara jatqan qaıyq birde kórinip, birde ǵaıyp bolady. Kórinbeı ketken saıyn júrek qobaljyp, kúdik molaıa túsetindeı. Motorly qaıyqtyń ózi qasat qarǵa maltyqqan shana qusap júrisi ónbeı qoıdy. Áýpirimdep jete bergende yqqan qaıyqtyń ústindegi eresek eki adamnyń bireýi sýǵa sekirip ketken. Anyq kórdi. Áıtse de Rústem Dostııaruly bul árekettiń sebebin túsine alǵan joq. Ishine sý tolyp, kól túbine shóge bastaǵan kishkentaı qaıyq janymyzdy saqtap qalmas dep oılaǵan bolar. Máseleniń mánisine keıin jan shaqyryp, es jıǵannan keıin baryp jetken. Sóıtse, er adam kishkentaı balasy bar kelinshekti kól betinde qaıyqpen serýendeýge shaqyrǵan. Kúnniń daýyldatyp, kóldiń alasuryp jatqanyn da eskermegen. Al qaýip tóngen kezde serýendeýge alyp shyqqan adamdaryn tastap, qaıyqtan sekirip ketken. Abyroı bolǵanda qutqarýshylar aldymen qaıyqtaǵy kelinshek pen balany anyq tónip kelgen aq ajaldyń aýzynan julyp aldy. Arada az ýaqyt ótkennen keıin qaıyqty tastaı qashqan er adam da qutqaryldy. Qas-qaǵym sáttiń arasynda jalpaq tilmen aıtqanda, ana dúnıege bir baryp qaıtqan úsh birdeı adamdy aman alyp qaldy. Kórer jaryqtary bar eken.
– Bul bir ǵana sát, deıdi Rústem Dostııaruly, – negizi mundaı oqys oqıǵa jıi kezdesedi emes pe? Biraq bizdiń áriptesterimiz óz is-áreketin eshqashan erlikke balamaıdy. Saıyp kelgende, júrek qalaýymyzben tańdap alǵan mamandyǵymyz. Tek qysyltaıań sátte abyrjyp qalmaı, batyl sheshim qabyldap, óz basyńa tónip turǵan qaýip-qaterdi de elemeı, júrektilik kórsetýiń qajet. Tutastaı alǵanda, qutqarýshylardyń ábjil qımyly talaı adamdy ajaldan aman alyp qalǵanyn bilemin.
Endi birde sý qoımasyna jas qyz batyp ketken eken. Kýágerlerdiń aıtýyna qaraǵanda, oqıǵanyń shapshań órbigeni sonshalyqty, baıǵus balaǵa qol ushyn berý eshkimniń qolynan kelmegen. Endigisi – sý túbinde qalǵan máıitti tabý. Adamgershilik paryz. Zar eńiregen ata-anasynyń da tilegi – osy. Tereńdigi 20 metrden asatyn sý qoımasynyń tabanynan on ekide bir gúli ashylmaı jatyp opat bolǵan beıkúná qyzdy tabý óte qıyn bolǵan eken. Osy zamanǵy qural-jabdyqtar da qoldanylǵan. Tájirıbeli qutqarýshylardyń kúsh-jigeri jumyldyrylǵan. Úshinshi kúni Rústem Dostııaruly tapqan. Búk túsip, sýyqqa tońǵan adamsha búrisip jatyr eken. Jaǵalaýǵa alyp shyqqansha júregi atqaqtaı soǵyp, eljirep ketken. Qaıǵydan qara jamylǵan ata-anasynyń qasiretin aıtyp jetkizý múmkin emes. Kúıreı qınalyp, óz betterin ózderi jyrtyp, janyn qoıarǵa jer taba almaı jan ushyrǵan ata-anasy máıitti sý betine alyp shyqqan qutqarýshylarǵa alǵysyn jaýdyryp jatyr.
– Keıde bir ótken ómir belesterińniń órnekti joly ispetti adamdarǵa sharapatyń tıip, jaqsylyǵyń jan-dúnıesin nurlandyryp jatqanyn kórgennen artyq baqyt joq. О́ıtkeni alǵys bizdiń qyzmetimizge oraı mańdaıymyzǵa jazylǵan el syıy emes pe?! – deıdi bizdiń keıipkerimiz.
О́tken jyly Túrkııada jer silkinisi oryn alǵan kezde zilzalanyń zardabyn joıýǵa qatysqan. Túbi bir túrki eliniń aqsaqaldary qazaqtyń azamattarynyń qajyrly eńbegine tánti bolyp, aq batasyn beripti. Qanshama qutqarýshy kún saıyn oqtaýly myltyqtyń uńǵysynyń ushyndaǵydaı qaýip-qaterge keýdesin tósep júrse de qos qoltyǵynan demep, jebeıtin perishte peıil, aq nıetti adamdardyń alqaýsyz alǵysy shyǵar. Kóptiń alǵysyn alǵanǵa ne jetsin, shirkin!
Aqmola oblysy
