Sýretter Manas Qaıyrhanulynyń jeke muraǵatynan alyndy
– Manas Qaıyrhanuly, eń áýeli sizdi kásibı merekeńizben quttyqtaımyn. О́zińizdi tanystyryp ótseńiz.
– Kóp raqmet! Mereke qarsańynda kóńilim bir kóterilip qaldy. Qýanyshtymyn! Men Shyǵys Qazaqstan oblysy Tarbaǵataı aýdany Aqsýat aýylynyń týmasymyn. Qazir Astana qalasyndaǵy 17-О́rt sóndirý bóliminiń júrgizýshi-qyzmetkeri bolyp jumys isteımin. Qyzmetke qabyldanǵanyma tup-týra eki jyl boldy. Jasym 24-te.
– Qutqarýshy óz basyn qaterge tigip, únemi tótenshe jaǵdaıda jumys isteıdi. Ońaı qyzmet emes. Bul mamandyqty óz qalaýyńyzben tańdadyńyz ba?
– Meniń bul mamandyqty tańdaýyma ápkem sebepker boldy. Ol bul mamandyqtyń mártebeli mindeti jaıynda aıtqanda birden qyzyǵýshylyǵym oıandy. Halqymyzdyń ıgiligi men tabıǵatymyzdyń qundylyqtaryn túrli qaýip-qaterden qorǵap, adamdardyń ǵumyryn saqtap qalý abyroıly is ekenin jaqsy bilemin. Sondyqtan da bul tańdaýyma esh ókinbeımin. Mektepti támamdaǵan soń, 2015 jyly Semeı qalasyndaǵy Eýrazııalyq gýmanıtarlyq kolledjine órt sóndirý mamandyǵyna oqýǵa tústim. Oqýymdy sátti aıaqtaǵan soń ózimizdiń aýyldyq jerde órt sóndirý bóliminiń jumysyna aralasyp júrdim. Tórt aı ýaqyt qujat isin ıgerip, sondaǵy qyzmetkerlerge kómektestim. Sol kezde órt sóndirip ári adamdardy qutqaryp júrgen qyzmetkerlerdi kórip, syrttaı qyzyqtym. Men de adamdarǵa qarlyǵashtyń qanatymen sý sepkendeı ǵana bolsa da kómekteskim keldi. Sóıtip júrgenimde áskerge shaqyrtý aldym. Bir jyl Mańǵystaý oblysy Beıneý aýdanynda Otan aldyndaǵy boryshymdy ótedim. Men onda júrgizýshi boldym. Júrgizýshi kýáligimde KamAZ aıdaýǵa ruqsat bar. Áskerden kelgen soń óz mamandyǵymmen jumys istegim keletinin túsindim. Ata-anam bul oıymdy quptap, Astanadaǵy ápkelerimniń janyna batasyn berip jiberdi. Sóıtip qazir ózim qyzmet etip júrgen 17-О́rt sóndirý bólimine qujattarymdy tapsyrdym. Biraq sol kezde kadr bólimi meni júrgizýshi etip alady dep oılamadym. О́rt sóndirýshi qyzmetine úmitti edim. Meniń áskerı bıletimdi kórgen kadr bóliminiń mamandary birden maǵan júrgizýshi qyzmetin usyndy. Men kóp oılanbastan kelise kettim.
– Aýyr tehnıkany júrgizýdiń óz qıyndyqtary bar shyǵar.
– Kólik keptelisi kóp megapolıste aýyr tehnıkany tizgindeý ońaı emes. Sol sebepti de bizde júrgizýshiler jetispeıdi. Basym kópshiligi júrgizýshi bolýǵa kelise bermeıdi. Meniń ózim de alǵashynda KamAZ-dy júrgizýge júreksinetinmin. Degenmen osynda uzaq jyldar boıy qyzmet etip kele jatqan aǵa býynnyń jón silteýimen qyzmetime tez úırenisip kettim. Qazir qalanyń biraz jolyn jaqsy bilemin.
– Shaqyrtýǵa asyǵyp bara jatqanda ózge kólikter jol bere me?
– О́kinishke qaraı, keıde shaqyrtýǵa asyǵyp bara jatqanda bizdiń aldymyzdy bógep turyp alatyn kólikter bolady. Mýzykanyń daýysyn qatty shyǵaryp qoıatyn kólik júrgizýshileri bizdiń dabyldyń daýysyn estimeıdi de. Biz tótenshe jaǵdaı ornyna jyldam jetý úshin baǵdarshamnyń qyzyl belgisine ótip, joldyń qarsy betine de shyǵýymyz múmkin. Degenmen de janymyzdaǵy kólikterge arnaıy belgimizdi berýdi umytpaımyz. Kóp jaǵdaıda kólik júrgizýshileri túsinistikpen qaraıdy.
– Sizdiń mindetińizge tek kólik tizgindeý kire me?
– О́rt sóndirý ujymdyq jumys. Sol sebepti men tek júrgizýshiniń jumysyn atqarmaımyn. Meniń eń áýelgi mindetim – órt sóndirýshilerdi apat ornyna jyldam jetkizý. Odan keıingi mindetim – qyzmetkerlerge órt sóndirýge qajetti sý qoryn berip otyrý. Shyntýaıtynda bizge kólikti qaraýsyz qaldyrýǵa, odan alys ketýge bolmaıdy. Sondyqtan órt kezinde árkim óz mindetin atqarady. Al órt sóndirilgennen keıin álbette biz áriptesterimizge kómektesemiz.О́ıtkeni órt sóndirýshilerdiń ekıpırovkasy men túrli jabdyqtary aýyr keledi.
– Tabıǵı jáne tehnogendi apattar kezinde, kúndelikti syn sátte sizderge úlken jaýapkershilik júkteledi. Bul mártebeli mindetti abyroımen atqarý úshin úlken júrek kerek. Shaqyrtýǵa bara jatqan sátte túrli sezimderdi bastan ótkeretin shyǵarsyzdar.
– Dabyl qaǵylǵan sátten bastap biz 1 mınýt bolmaı barynsha tez apat ornyna shyǵýymyz kerek. О́rt sóndirý bóliminiń arnaıy óz jyldamdyq rejımi bar. Odan asýǵa bolmaıdy. Barynsha tez jetýge tyrysamyz. Árıne, elimizde órt bolmasa eken dep tileımiz. Biraq bola qoıǵan jaǵdaıda biz eń aldymen ózimizdiń emes, ózgeniń ómirin birinshi kezekke qoıamyz. Bizdiń basty mindetimiz – adamdardy qutqarý, olardyń ómirin saqtap qalý. Qorqynysh sezimi bolatynyn jasyrmaımyn. Biraq jolda kele jatqanda aǵa býyn áriptester barynsha aqyl-keńesin aıtyp, kómektesip otyrady. Sol sózder bizge medet bolady. Osy rette Qostanaı oblysynda bolǵan iri orman órti esime túsip otyr. Sol tótenshe jaǵdaı ornyna men de bardym. Ol kezde jumysqa kirgenime bir jyl bolǵan. Alla sátin salyp, jumysymyzdy abyroımen atqaryp keldik.
Jumysym ózime unaıdy, mamandyǵymdy maqtan etemin. Tótenshe jaǵdaılar mınıstrligi tarapynan bizge kóp qoldaý kórsetiledi. Qajetti qural-jabdyqtarymyzdyń barlyǵy jańa, jalaqymyz ben syıaqymyzdy ýaqtyly alamyz. Bastysy halyqtyń rızashylyǵyna bólenip kelemiz. Biz úshin eń qymbaty da osy – qalyń buqaranyń ystyq kóńili.
– Áńgimeńizge raqmet! Jaýapty jumystaryńyzǵa tabys, otbasylaryńyzǵa amandyq tileımin!
Áńgimelesken,
Marjan TILEÝBEK,
«Egemen Qazaqstan»
