– Bıyl biz Terekti aýdanyna qarasty Barbastaý aýylynda jáne Báıterek aýdanyndaǵy Qaınar aýylynda osyndaı nysan ashyp, halyq ıgiligine bergen edik. Búgin úshinshi nysan О́leńti aýylynda ashylyp jatyr. Jyl sońyna deıin taǵy 9 nysandy paıdalanýǵa beremiz. Aýyldaǵy mundaı densaýlyq saqtaý oryndary halyqtyń der kezinde skrınıng ótýine, sol arqyly kóptegen aýrýdyń aldyn alýǵa septigin tıgizedi dep esepteımiz, deıdi oblystyq densaýlyq saqtaý basqarmasynyń basshysy Erlan Toqsanov.
Qurylys jumysyna qazynadan 292 mln teńge bólingen. Jalpy kólemi 324 sharshy metrlik nysan qurylysyn «Fırma ISKOM» kompanııasy úsh aı ishinde salyp shyqqan.
Jańa ǵımaratta standartqa saı feldsher, akýsher kabınetteri, prosedýralyq, zararsyzdandyrý, egý bólmeleri, oqshaýlaǵysh, fıltr, sharýashylyq-turmystyq úı-jaılar, hımızator t.b. kabınetter jasaqtalǵan. Qyzmetke qajetti medısınalyq qondyrǵylar – gınekologııalyq kreslo, 2 tońazytqysh, kvars-lampalar, ólsheý quraldary, akvadıstılıator, qurǵatqysh shkaf, kýshetkalar, manıpýlıasııalyq ústel, medısınalyq shkaf, jıhaz jáne keńse tehnıkasymen tolyq jabdyqtalǵan. Munda 2 meıirger, 1 kishi býyn qyzmetkeri qyzmet etpek.
О́leńti aýylynda 950 turǵyn bar. Aýdan ortalyǵynyń irgesinde ornalasqan eldi meken turǵyndarynyń 235-i – 14 jasqa deıingi balalar. Jyl basynan beri munda 10 sábı dúnıege kelipti. 7 áıeldiń aıaǵy aýyr. Qaterli isik jáne týberkýlez aýrýlary tirkelmegen. Bolashaqta aýyl turǵyndarynyń densaýlyq sapasy budan da jaqsaratynyna kepildik bar. О́ıtkeni jańa nysan qajet kezinde kúni-túni qyzmet kórsetip, aýyl turǵyndarynyń densaýlyǵy úshin aıanbaı jumys isteýge daıar otyr.
– Osyndaı feldsherlik-akýsherlik pýnkt bizdiń aýylǵa aýadaı qajet edi. Respýblıka kúni qarsańynda aýylymyzǵa úlken syılyq boldy. Bul Otanymyzdyń aýyl halqyna degen qamqorlyǵy dep sezinemiz. Aralap shyqtym, jarqyrap tur! Barlyq kabıneti bar, óte keremet jabdyqtalǵan. Qýanyshymyzda shek joq! Halqymyz rıza, deıdi aýyl turǵyny Márııam Sársenǵalıeva. Aýyldyń baıyrǵy turǵyny búgingi saltanatqa toıǵa kelgendeı saltanatpen, ulttyq kıimmen kelipti.
Shynynda da О́leńti aýyly úshin jańa nysannyń ashylýy qýanyshty mereke retinde atalyp ótti. Saltanatty jıynǵa oblystyq densaýlyq saqtaý basqarmasynyń basshysy Erlan Toqsanov, oblystyq qurylys basqarmasy basshysynyń orynbasary Nurken Moldashev, Syrym aýdanynyń ákimi Jumageldi Batyrnııazov, aýdandyq máslıhat hatshysy Shynar Dúısenǵalıeva, «ISKOM» jaýapkershiligi shekteýli seriktestiginiń dırektory Rafıg Mamedov, aýdandyq qoǵamdyq Keńes tóraǵasy Ashat Dúısenǵalıev, taǵy basqalary qatysty.
– О́leńti aýylynyń halqy ulttyq merekemiz Respýblıka kúni qarsańynda densaýlyq saqtaý salasyndaǵy taǵy bir ıgi istiń kýási bolyp otyr. «Aýyryp em izdegenshe, aýyrmaıtyn jol izde» dep dana halqymyz aıtqandaı, biz úshin eń bastysy – adamnyń ómiri men onyń deniniń saýlyǵy. Bul medısınalyq nysan sizderge tek aýrýdyń aldyn alý úshin qyzmet etýine tilektespin, dedi aýdan basshysy Jumageldi Joldybaıuly.
Batys Qazaqstan oblysy
