Foto: ashyq derekkóz
Qaıǵyly oqıǵa 25 qazan kúni Abaı oblysy Aıagóz qalasynda bolǵan. Jekemenshik úıden órt shyǵyp, oqys oqıǵa saldarynan 4 búldirshinniń ǵumyry qyrshynnan qıyldy. Qaza bolǵan balalardyń eń úlken egizderi nebári 8 jasta, al inileri 3 jáne 2 jasta bolǵan.
Bul otbasyn jaqsy biletin Aıagózdik turǵynnyń aıtýynsha, ákesi Baýyrjan Aıagóz qalasyndaǵy Qazyǵul aýrýhanasynda jedel járdem kóliginiń júrgizýshisi. Anasy Araı Naýryzbaeva jumyssyz.
«Otbasy shaǵyn mal sharýashylyǵymen aınalysyp, sút ónimderin satady. Aýdandyq basshylar 1989 jylǵy «Volkswagen Passat» kóligi bar, tabysy kóp dep memleketten alyp otyrǵan AÁK-ti kesip tastaǵan. Anasy 4 balaǵa nápaqa bolsyn dep sút satady. Bazarǵa júgirip baryp kelgende qulynshaqtarynyń ornyn sıpap qalǵan. Otbasynyń turyp jatqan úıi Baýyrjan Faızýllınniń ata-anasyna tıesili. Araı da, Baýyrjan da es-tússiz kúıde qaldy», dedi qala turǵyny massaget.kz saıtyna bergen aqparatynda.
Sondaı-aq balalardyń úıde jalǵyz qalǵandary anyqtaldy. Bul týraly Eńbek jáne halyqty áleýmettik qorǵaý mınıstri Svetlana Jaqypova «О́zgeris dáýirindegi eńbek naryǵy» atty halyqaralyq konferensııa kýlýarynda aıtty.
«Qazirgi ýaqytta komıssııa jumys júrgizip jatyr. Balalardyń ákesi jedel járdem qyzmetinde jumys isteıdi, anasy azyq-túlik alýǵa shyǵyp ketken. Balalar úıde jalǵyz qalǵan. Negizi balalardy jalǵyz qaldyrýǵa bolmaıdy. Komıssııa óz sheshimin shyǵarady. Bizdiń tarapymyzdan tek qana járdemdesý – psıhologııalyq qoldaý kórsetý», dedi mınıstr.
Abaı oblysy Polısııa departamentiniń habarlaýynsha, jazataıym oqıǵaǵa baılanysty sotqa deıingi tergeý jumystary bastaldy.
«Aıagóz qalasynda jas balalardyń kómirtegi totyǵynan qaıtys bolýyna baılanysty jazataıym oqıǵa faktisi boıynsha Abaı oblysy PD Aıagóz aýdandyq polısııa bólimimen sotqa deıingi tergeý bastaldy. Birqatar saraptama taǵaıyndaldy, sotqa deıingi tergeý júrip jatyr. О́zge aqparat tergeý múddesinde, QR QPK-niń 201-babyna sáıkes jarııa etýge jatpaıdy», dep habarlady departamentten.
