Sportty damytý dıreksııasy baspasóz qyzmetiniń málimeti boıynsha Qaısar Alpysbaı (60 kg) men Móldir Jańbyrbaı (50 kg) óz salmaqtaryndaǵy irikteýden súrinbeı ótip, altyn júlde úshin beldesýge múmkindik aldy. Kýmıte baǵdarlamasynyń jartylaı fınalynda Q.Alpysbaı 2018 jylǵy álem chempıony ıtalııalyq Andjelo Kreshensodan 5:1 esebimen basym tústi. Endi Qaısar altyn medal úshin Eýropa oıyndarynyń úsh dúrkin júldegeri grekııalyq Hrıstos-Stefanos Ksenospen kúsh synasady.
Al M.Jańbyrbaı jartylaı fınalda qyzdar arasyndaǵy álemdik reıtıngte kósh bastap turǵan Venesýela ókili Iogelıs Salazardy aıqyn basymdyqpen jeńip (11:3), jahandyq dodanyń sensasııasyn jasady. Ol fınalda ıtalııalyq Ermınııa Perfettomen kezdesedi.
Osylaısha, karateden álem chempıonattarynyń tarıhynda alǵash ret eki jerlesimiz fınalǵa shyǵyp otyr. Sondaı-aq taǵy eki otandasymyz – Dıdar Ámiráli (67 kg) men Sofıa Berýlseva (+68 kg) qola medal úshin talasady.
