Bıylǵy sary qurlyqtyń basty básekesinde Qazaqstan quramasy sapynan 131 sportshy synǵa túsip, el abyroıyn sátti qorǵady. Olar sporttyń 14 túri boıynsha júldege talasyp, jarys qorytyndysynda 8 altyn, 12 kúmis jáne 21 qola medaldy ulttyq qurama qorjynyna saldy. Osylaısha, otandastarymyz 41 júldemen jalpykomandalyq esepte eń úzdik 11 qurama qatarynan tabyldy. Bul – Qazaqstan Paraazııa sportshylary úshin tarıhı kórsetkish. Sonymen qatar jarys barysynda sportshylarymyz Azııanyń – úsh, Azııa para oıyndarynyń tórt rekordyn jańartty.
Salystyrý úshin aıtar bolsaq, osyǵan deıingi eń úzdik nátıje bes jyl buryn Indonezııadaǵy III Paraazııa oıyndarynda tirkelip, sportshylarymyz 33 medalmen (5 altyn, 15 kúmis, 13 qola) jalpykomandalyq esepte 13-orynǵa turaqtaǵan edi. Jerlesterimiz bul júldelerdi parajúzý, paradzıýdo, parapaýerlıftıng, para jeńil atletıka, voleıboldy otyryp oınaý jáne shahmat básekelerinen jeńip alǵan edi.
Hanchjoýdaǵy dúbirli dodada el sportshylary parakanoe, parapaýerlıftıng, paradzıýdo, para jeńil atletıka, parajúzý, parataekvondo, shahmat, paravelosport jáne voleıboldy otyryp oınaý jarystarynan túrli tústi júldelerdi qorjynǵa saldy.
Atap aıtar bolsaq, parapaýerlıftıngte Tokıo Paralımpıadasynyń jeńimpazy Davıd Degtıarev Azııa para oıyndarynda da úzdik shyǵyp, el qorjynyna alǵashqy altyndy saldy. 54 kg salmaqta óner kórsetken otandasymyz 186 kılony baǵyndyryp, Azııa jáne Azııa para oıyndarynyń rekordyn jańartty. Ol Tokıoda 174 kılony eńsergen edi. Sonymen qatar Tursynaı Qabyl (41 kg) men Raýshan Qoıshybaeva (73 kg) kúmispen kúptelse, Gúlim Qurmanbaeva (45 kg) men Rahmetjan Hamaev (88 kg) qola júldeni qanjyǵasyna baılady.
Paradzıýdo kúresinde de otandastarymyz tamasha nátıje kórsetti. Úsh birdeı jerlesimiz Aqmaral Naýatbek (45 kg/ J2), Erǵalı Shameı (73 kg/ J1) jáne Oljas Orazalyuly (73 kg/ J2) barlyq qarsylasynan basym túsip, altyn tuǵyrdan kórindi. Kúmis júldege Asylan Nurdáýletov (73 kg/ J1), Janbota Amanjol (-90 kg/ J2), Zarına Raıfova (70 kg/ J2) jáne Erlan О́tepov (+90 kg/ J2) ıe boldy. Al Baýyrjan Arystanbek (-90 kg/ J1), Daıana Fedosova (52 kg/ J2), Dınara Kýdjýlova (70 kg/ J1), Ǵalymjan Smaǵululy (-90 kg/ J2), Erlan Qońqıev (+90 kg/ J2), Talǵat Ájǵalıev (+90 kg/ J2) jáne Ánýar Sarıev (60 kg/ J2) qola júldeni enshiledi. Osylaısha, dzıýdoshylar jalpykomandalyq esepte ekinshi orynǵa jaıǵasty.
Para jeńil atletıkanyń ıadro laqtyrý saıysynda synǵa túsken Dastan Muqashbekov altyn medal ıegeri atandy. Ol 15,74 metr nátıjesimen Azııa jáne Azııa para oıyndarynyń rekordyn jańartty. Sondaı-aq osy sanatta baq synaǵan Ivan Zeleznıak 12,39 metr kórsetkishpen qola medal jeńip aldy.
Parajúzýden Nurdáýlet Jumaǵalı eki altyn júlde enshiledi (100 metr brass jáne 200 metr keshendi júzý). Oǵan qosa 200 metrge keshendi júzýde Azııa para oıyndarynyń rekordyn jańartty. Sonymen qatar Dıas Kenjebek 100 metr qashyqtyqty 1:05:42 sekýndta baǵyndyryp, Azııa jáne Azııa para oıyndarynyń rekordyn ornatty. Al Nuráli Sovetqanov 100 metr brassta, Roman Potapov 100 metr shalqalap júzýde jáne 4h50 m aralas estafetada óner kórsetken Zýlfııa Gabıdýllına, Sııazbek Dálıev, Natalıa Zvıagınseva jáne Aısultan Qulqaev qola medal jeńip aldy.
Parakanoede Bıbarys Spataı KL2 jáne VL3 sanatynda qos kúmisti qanjyǵasyna baılasa, Jalǵas Taıkenov KL3 sanatynda kúmis júldeger atandy. Al Jańyl Baltabaeva KL3 sanaty, Maksım Bogatyrev KL1 sanattary boıynsha qola júldege ıe boldy.
Parataekvondoda Nyshan О́miráli (80 kg) men Kámıla Dosmalova (57 kg) kúmis júldeger atansa, Márııam Sálimgereeva (65 kg), Nurlan Donbaev (80 kg) pen Alısher Garıpollaev (+80 kg) qola júldeni moınynda jarqyratty. Sonymen qatar quramynda Álimjan Aıapov pen Serik Soltanov bar shahmattan erler komandasy qola medal jeńip alsa, paravelosportta Kenjeǵul Seıitjan men onyń pıloty Anton Lavrentev qola júldeger atandy. Sondaı-aq jekeleı ýaqyt esebindegi básekede Kenjeǵul el qorjynyna taǵy bir qola júldeni saldy.
Voleıboldy otyryp oınaýda ulttyq qurama sportshylary kúmis júldege ıe boldy. Sportshylarymyz jartylaı fınalda alań qojaıyndary Qytaı quramasyn 3:2 esebimen jeńip, fınalda álem jáne Azııa chempıony Iran sportshylaryna 3:0 esebimen ese jiberdi.
Bıylǵy Paraazııa oıyndaryna Azııanyń 43 memleketinen 4 myńǵa jýyq sportshy qatysyp, sporttyń 22 túrinen jalpy sany 564 medal (paralımpıadalyq sport túrinen – 490 jáne paralımpıadalyq emes sport túrinen – 74) jıyntyǵyn sarapqa saldy. Qazaqstan quramasy bıylǵy dodada para jeńil atletıka, bochcha, parapaýerlıftıng, shahmat, parajúzý, paravelosport, paradzıýdo, parakanoe, voleıboldy otyryp oınaý, parataekvondo, para sadaq atý, para ústel tennısi, akademııalyq esý jáne para oq atý sııaqty sport túrlerinen synǵa tústi.
Aıta keteıik, jazǵy Azııa oıyndarynda júlde alǵan sportshylar men olardyń jattyqtyrýshylaryna berilgen aqshalaı yntalandyrý syılyqaqysynan para sportshylar da qur qalmaıdy. Iаǵnı paraazıada chempıony atanǵan sportshyǵa memleket tarapynan 10 myń dollar, kúmis júldegerge – 5 myń, qola medal ıegerine 3 myń dollar kóleminde qarjylaı syıaqy tabystalady. Sonymen qatar altyn medal ıegerin jarysqa daıyndaǵany úshin onyń jattyqtyrýshysyna – 5 myń, kúmis júldegerdiń bapkerine – 3 myń jáne qola júldegerdiń jattyqtyrýshysyna 2 myń dollar kóleminde aqshalaı yntalandyrý belgilengen.
