Dúnıejúzilik jekpe-jek oıyndary (WCG) – bul Halyqaralyq Olımpıada komıteti (HOK) qoldaıtyn jáne álemniń túkpir-túkpirinen jekpe-jek óneri men onyń eń myqty ókilderi qatysatyn halyqaralyq sporttyq is-shara. WCG-diń basty maqsaty – jarystardy ótkizý ǵana emes, sonymen qatar ózin-ózi baqylaý jáne tehnıkalyq sheberlik sııaqty sporttyq qundylyqtardy nasıhattaý. Bul oıyndar ártúrli mádenıetterdiń ózara ıntegrasııalanýyna jáne jekpe-jek óneri boıynsha bilim men tájirıbe almasýǵa yqpal etedi.
Qazaq kúresin jekpe-jektiń eń tanymal túrleri boıynsha ótkiziletin WCG baǵdarlamasyna engizý týraly sheshimdi Halyqaralyq sport federasııalary, halyqaralyq sport federasııalarynyń jahandyq qaýymdastyǵynyń (GAISF) músheleri qabyldaǵan bolatyn. GAISF – táýelsiz halyqaralyq sport federasııalaryn jáne búkil álem boıynsha sportty damytýǵa baǵyttalǵan basqa da halyqaralyq uıymdardyń basyn biriktiretin uıym. Qazirgi ýaqytta GAISF júzden astam halyqaralyq uıymmen tyǵyz qarym-qatynas ornatyp, tıimdi jumys isteıdi. Búgingi tańda WCG GAISF qoldaýynyń arqasynda elıtalyq sport pen jergilikti qaýymdastyqtar arasynda altyn kópir ornatyp, jastardy jekpe-jek sport túrlerimen aınalysýǵa yntalandyrý jumystaryna basymdyq beredi.
Er-Rııadtaǵy jarys barysynda birqatar sport túrleri, sonyń ishinde qazaq kúresi boıynsha marapattar jıyntyǵy sarapqa salyndy. Bes salmaqta (3 er jáne 2 áıel) jeńimpaz júldegerler anyqtaldy. Abyroı bolǵanda, ulttyq qurama balýandary joǵary básekelestikke qaramastan úzdikter qatarynan kórine bildi. Atap aıtqanda, Jumajan Qojambekov (75 kg), Mádı Amangeldi (85 kg) jáne Roza Nysantaı-
qyzy (70 kg) qarsylas shaq keltirmeı, jeńistiń bıik tuǵyryna kóterildi. Nur Amanshúkirov (65 kg) fınalda О́zbekstannan kelgen sportshyǵa jol berip, kúmis medalǵa qol jetkizdi. Al Raýza Nurmuhambetovanyń (60 kg) enshisinde – qola medal.
Osylaısha, Qazaqstan quramasy úzdik nátıje kórsete otyryp, jalpykomandalyq esepte birinshi oryndy ıelendi. О́zbekstannyń balýandary ekinshi bolsa, qyrǵyzstandyq sportshylar úzdik úshtikti túıindedi.
«Egemen-aqparat»
