«Oqıǵa 1 qarashada bolǵan. Túnde Aqtóbe qalasyndaǵy iri saýda-oıyn saýyq ortalyqtarynyń birindegi dúkennen asa iri kólemde altyn buıymdar urlanǵan. Zergerlik buıymdardyń joǵalǵanyn satýshy kelesi kúni tańerteń baıqaǵan. 29 jastaǵy kásipkerge keltirilgen shyǵyn kólemi 25 mıllıon teńgege jýyqtady», dep jazylǵan habarlamada.
Atalǵan derek boıynsha polısııa qyzmetkerleri beınekameralardyń jazbalaryn zerdeleý kezinde medısınalyq betperde kıgen er adamnyń saýda ornyna jasyryn kirip, shkaftan altyn buıymdardy urlaǵany anyqtaldy. Polısııa qyzmetkerleri jedel-izdestirý sharalaryn júrgizý barysynda kúdiktiniń jeke basyn «izin sýytpaı» anyqtady. Ol 25 jastaǵy aýdan turǵyny bolyp shyqty.
Anyqtalǵandaı, kúdikti túngi ýaqytta saýda-oıyn saýyq ortalyǵyna kirip, óziniń 3 sybaılasymen birlese áreket jasaǵan. Olar ortalyqtyń ishinde bir-birimen qulaqqap arqyly baılanysyp otyrǵan jáne osy qylmysty jasaǵannan keıin Oral qalasyna boı tasalaǵan. Kúdiktilerdiń barlyǵy buryn sottalǵan oblys turǵyndary ekeni anyqtalyp, 2 qarashada olar krımınaldyq polısııa qyzmetkerlerimen Oral qalasynda ustaldy.
Urlanǵan altyn buıymdar tárkilendi. Qazaqstan Respýblıkasy Qylmystyq kodeksiniń 188-babynyń 4-bóligimen (Urlyq) qozǵalǵan qylmystyq is sheńberinde sotqa deıingi tergep-tekserý júrgizilip jatyr.
