Turar Rysqulov aýdanynyń halqy tańnan saılaý ýchaskelerine aǵylyp kelip jatty. Alǵash ret qolǵa alynǵan aýdan ákimderiniń saıası naýqanyna belsendi atsalysqan turǵyndar aımaq basshysyn ózderi tańdaıtynyna qýanyshty. Saıası naýqanda Turar Rysqulov aýdanynyń ákimi laýazymyna úmitker retinde úsh kandıdat tirkelgen. Olardyń qatarynda bir jyldan astam ýaqyt aýdan tizginin ustaǵan Ernar Esirkepov te bar.
«Buryn tek Prezıdent pen túrli deńgeıdegi depýtattardyń saılaýyna ǵana qatysatyn edik. Endi aýdan ákimderin tańdaý múmkindigi jergilikti halyqtyń qatysýymen iske asyp jatqany – quptarlyq qadam. Aımaq tizginin qolǵa alýǵa nıet tanytyp otyrǵan kandıdattardyń barlyǵy da jergilikti azamattar. Qarapaıym halyqpen birge biz de tańdaýymyzdy jasadyq. Jeńiske jetken kandıdat aýdannyń áleýmettik-ekonomıkalyq turǵydan órkendeýine yqpal etetinine senim mol», deıdi Qulan aýylynyń turǵyny Ǵalııa Dúısenbekova.
Jalpy, Turar Rysqulov aýdanynda 40 419 azamat saılaýshy retinde tirkelse, onyń 20 541-i saıası naýqanǵa qatysyp, tańdaý jasady. Saılaý qorytyndysynda kandıdat Sapar Qulmanovqa 1 891 azamat daýys berse, Baqytbek Ábilázimov 1 804 daýysqa ıe bolǵan. Al «Amanat» partııasy usynǵan Ernar Esirkepov 16 179 daýyspen jeńiske jetti. Saıası naýqanda daýys bergenderdiń 309-y «Bárine qarsymyn» degen baǵandy tańdapty.
Osylaısha, óńirdegi eń jas eki ákimniń biri retinde Turar Rysqulov aýdanynyń tizginin ustaǵan Ernar Esirkepov halyqtyń qalaýymen aýdan tizginin qaıta qolyna aldy.
Jýaly aýdanynda da aýdan ákimin saılaý naýqany sátimen ótti. Saıası naýqanǵa 31 323 saılaýshynyń 19 720-sy qatysyp, tańdaý jasady. Nátıjesinde, úsh kandıdattyń ishinen sýyrylyp shyqqan aýdannyń burynǵy ákimi Jalǵas Murtaza 16 520 turǵynnyń senimine ıe bolyp, jeńiske jetti.
Jalpy alǵanda qanatqaqty rejimde uıymdastyrylǵan aýdan ákimderiniń saılaýy qorytyndysynda jyl buryn eki aýdannyń tizginin ustaǵan eń jas eki ákim oryntaǵyn saqtap qaldy. Jergilikti halyq jas basshylardyń senim údesinen shyǵatynyna bek senimdi. Osyǵan qarap-aq Ernar Esirkepov pen Jalǵas Murtazanyń moınyna artylǵan júktiń jeńil emestigin baǵamdaýǵa bolady.
Jambyl oblysy
