Eńbek jáne halyqty áleýmettik qorǵaý mınıstrligi baspasóz qyzmetiniń málimetinshe, bıyl jalpy 5 796 mıkrokredıt berý josparlanǵan. Búginniń ózinde «Agrarlyq nesıe korporasııasy» AQ-ǵa kásipkerlik bastamalardy iske asyrý úshin jastarǵa beriletin jyldyq mólsherlemesi 2,5 paıyzdyq jeńildetilgen mıkrokredıtter alýǵa 7,3 myń ótinim tússe, 5 205 joba maquldanypty.
Nesıeniń mólsheri 5 mln teńgege deıin, al qatysýdyń eń uzaq merzimi – 5 jylǵa (kez kelgen maqsatqa) nemese 7 jylǵa deıin (mal sharýashylyǵy salasyndaǵy jobalar úshin). Nomınaldy syıaqy mólsherlemesi jyldyq 2,5 paıyzdan aspaıdy. Mıkrokredıt alýǵa ótinimderdiń eń kóbi Túrkistan – 970, Jambyl – 786, 642-si Qyzylorda oblystaryna tıesili. Sondaı-aq Shymkentten – 466 jáne Astana qalasynan 456 ótinim tústi.
Konkýrstyq komıssııalardyń sheshimimen 5 205 joba maquldansa, onyń ishinde 4 554 jobany iske asyrýǵa kredıt berildi. Kredıt alýshylardyń basym kópshiligi mal sharýashylyǵy, qyzmet kórsetý, saýda, ósimdik sharýashylyǵy jáne jeńil ónerkásip salasyn qamtyp otyr. Sonymen qatar mıkrokredıt 21 jastan 35 jasqa deıingi jastarǵa óz kásibin ashýǵa nemese ony keńeıtýge, 5 jyldan aspaıtyn merzimmen jeke kásipker retinde tirkelgen jaǵdaıda beriledi. Bul jerde aıta ketetini, qatysýshylardyń «Agrarlyq nesıe korporasııasy» AQ-ǵa ótinimmen júgingen ýaqyttaǵy jasy eskerilýge tıis. Al mıkrokredıt alýshylar úshin negizgi borysh pen syıaqyny óteý boıynsha jeńildikti kezeń beriledi. Bul mıkrokredıt merzimi uzaqtyǵynyń úshten birinen aspaıdy.
Kepilmen qamtamasyz etýdiń bolýy da mindetti shart retinde qarastyrylady. Sebebi bıyl 4 qyrkúıekten bastap jastarǵa jyldyq 2,5 paıyz jeńildikpen mıkrokredıt berý úshin qabyldanatyn kepildi múlik túrleriniń tizbesi keńeıtilgen. Sonymen kepilmen qamtamasyz etý retinde qosymsha ekinshi deńgeıdegi bankterdegi shottarda ornalastyrylǵan aqsha qarajaty, respýblıkalyq mańyzy bar jáne oblystyq mańyzy bar qalalarda, aýdan ortalyqtarynda, oblystyq jáne aýdandyq baǵynystaǵy qalalarda, aýyldar men aýyldyq eldi mekenderde jyljymaıtyn múlik qabyldanady. Sondaı-aq olardyń qatarynda jekemenshik quqyǵyndaǵy jer ýchaskeleri men mamandandyrylǵan tehnıka da bar. Taǵy bir jaqsy jańalyǵy sol, kepilmen qamtamasyz etý bolmaǵan jaǵdaıda kepil berýshini tartýǵa bolady. Mundaı múmkindikti paıdalaný úshin ótinimdi «Agrarlyq nesıe korporasııasy» AQ fılıalyna tapsyrý qajet.
Aıta ketý kerek, mıkrokredıtter arnaıy komıssııanyń sheshimi negizinde beriledi. Onyń otyrystarynda úmitkerler ózderiniń bıznes-jobalaryn tanystyrady. Osylaısha, mıkrokredıt berý týraly sheshim komıssııalyq jáne naqty is-qımyl josparymen ózekti, dáleldi, ekonomıkalyq negizdelgen, qoǵamdyq mańyzy bar, ómirsheń bolýǵa tıis jobanyń pysyqtalýyn baǵalaýdyń naqty krıterııleri negizinde qabyldanbaq. Qazir mıkrokredıtter alýǵa ótinimderdi qabyldaý barlyq oblystarda, Astana, Almaty jáne Shymkent qalalarynda da bastalyp ketti.
