Kollajdy jasaǵan – Záýresh SMAǴUL ,«EQ»
Qazaqtyń birtýar kompozıtory Nurǵısa Tilendıev pen kórnekti aqyn Tumanbaı Moldaǵalıevtiń shyǵarmashylyq odaǵynan týǵan qaı án bolsyn tyńdarmanynyń tamyryn tap basatyny anyq. Adam kóńilindegi qubylystardy dóp tabatyn tulǵalardyń tandemi arqyly dúnıege kelgen kez kelgen shyǵarma ánnen mán izdegen jurtty súısintedi, súısindiredi. Eki alyptyń júregin jaryp shyqqan «Qustar áni» bolsyn, «Qaıran meniń júregim» shyǵarmasy bolsyn, qazaq mýzykasynyń altyn qoryndaǵy tańdaýly án bolyp saqtalatyny daýsyz. О́ıtkeni olar jazǵan ánniń ǵumyry uzaq.
Derekke sensek, «Qaıran meniń júregim» ániniń adam boıyn shymyrlatatyn alǵashqy shýmaǵy kompozıtordyń shańyraǵynda jazylǵan eken. Kúnderdiń kúninde syrqattanyp jatqan maestronyń shańyraǵyna soqqan Tumanbaı Moldaǵalıev kompozıtorǵa qaıyrylyp: «Qaı jeriń aýyryp jatyr?» dep surapty. Nurǵısa Tilendıevtiń jaýaby qysqa-nusqa shyqqan. «Júregim» depti ol aqyn baýyrynyń janashyrlyqpen qaraǵan júzine rıza keıip tanytyp.
Kompozıtordyń «Júregim» degen qysqa jaýaby aqynnyń janyn aıazdaı qaryp, óziniń de júregin qozǵap jiberse kerek. Qolyna qalamyn alǵan Tumaǵa lezde:
«Qaıran meniń júregim, jas júregim,
Kóktem ediń, bir kezde tasqyn ediń.
Jastyq dáýren, jaltaqtap qaraılaısyń,
Seni oılasam, uıqym da qashty meniń»,
degen óleń joldaryn jazyp ketipti.
Hal suraı barǵanda dúnıege kelgen bir shýmaq jyr keıinnen tolyq mátinimen ánge aınalady. Án bolǵanda da tyńdarmanyn eshqashan jalyqtyrmaıtyn taǵy bir ómirsheń shyǵarma dúnıege keledi.
Zymyrandaı zýlaǵan ýaqytty eshkimniń toqtata almaıtyny anyq. Syrtyn túrli mýzykalyq tásilmen totydaı tarandyryp qoıǵanmen, ishi, ıaǵnı mátini dalbasalap turǵan talaı án ýaqytsha hıtke aınalyp jatqany keıde ón boıyńdaǵy ókinish otyn tutandyryp jiberetini daýsyz.
Tipti uly aqyndardyń ólmes shyǵarmalaryn mansuqtaǵandaı etip, jeńil-jelpi áýenge aınaldyryp jatqandar da az emes qoı. Kózden ketken alyptardyń kóńilden ketpes týyndylary talan-tarajǵa túskenin kórgende, suraýsyz qalǵanyn sezingende boıymyzdy bir yza bılep alatyny da ras. Sol turǵydan alǵanda Nurǵısa Tilendıev pen Tumanbaı Moldaǵalıevtiń jolyn Jaratqannyń ózi shyǵarmashylyq jolda arnaıy túıistirip qoıǵandaı kórinetini bar.
«Qaıran meniń júregim, qyran qustaı,
Qanat barda shydaısyń qaıtyp ushpaı.
Ońashada jylaısyń aǵyl-tegil,
Qalaryńda belgisiz qaısy tusta»,
degen tarmaqtar kimniń de bolsyn kókeıinde saırap jatqany anyq. Kisi balasy aragidik bolsa da jany kúızeliske ushyraıdy, qamyǵady, jalǵannan baz keship jabyǵady. Kóńildiń kirin jýyp-shaıýdyń jolyn qarastyrady. Tipti aınalasyndaǵylardan qoldaý tappaǵan kezde psıhologııalyq apatqa ushyrap jatatyndar da az emes. Ondaı sátterde keýdedegi judyryqtaı etke salmaq túsetini aqıqat. Osy ánniń mátininde kóńil terezesine qonǵan sol bir kir-qońnyń bárin tazartyp alýǵa dem beretindeı energııa bar. Ony poezııa degen sóz óneriniń sarqylmas qýaty desek, qatelese qoımaspyz.
«О́kinbeımin, kún zýlap óte bersin,
Keıin keler júregim seni kórsin.
Jyrym meni eshqashan óltirmeıdi,
Ánim meni alysqa jetelersiń»,
degen Tumaǵanyń jyry da, ánge jazylǵan mátini de tyńdarman, oqyrmanymen jasaı beretini anyq.
«Qaıran meniń júregim» áni – ólmeıtin shyǵarma. О́ıtkeni esti tyńdarman barda eski ánniń tabıǵatyndaǵy áýen de joǵalmaıdy. Sebebi bul án qazaq óneriniń shoqtyǵy bıik juldyzy Nurǵısa Tilendıev pen aıaýly aqyn Tumanbaı Moldaǵalıevtiń máńgilikke qaldyrǵan ǵajap murasy.
