Qazaqsha mázirińiz qalaı?

Baıqaýǵa elimizdiń túkpir-túkpirinen 31 úmitker qatysyp,  jeńimpazdar men júldegerlerdi anyqtaýǵa fılologııa ǵylymdarynyń doktory, akademık Sherýbaı Qurmanbaıuly bastaǵan qazylar alqasy atsalysty.

Konkýrstyń alǵashqy sharty «Termın talqy» irikteý kezeńinde qatysýshylar «Termincom.kz» saıtyndaǵy «Qazaq ter­mınologııasynyń mazmuny men qurylymy» elektrondyq alańyna tir­kelip, óz pikirleri men usynystaryn jazsa, kelesi kezeń «Termın zerde» sharty boıynsha taǵamtaný  salasy ter­mınderiniń ishinen 15 termındi tańdap, úlgige sáıkes saraptama jasaldy. Kelesi kezekte «Mázirińiz ázir me?» atty taqyryp tańdalyp, osy suraq boıynsha qoǵamdyq tamaqtaný oryndaryndaǵy bes as máziriniń qazaq tilindegi nusqasy taldaý jasalyp, qajet degen jaǵdaıda qatysýshy balama nusqalaryn usyndy. Eń sońǵy «Termın-tezıs» kezeńinde úmitkerler taǵamtaný salasy nemese as mázirin qalyptastyrýdyń ózekti máseleleri boıynsha tezıs ázirledi.

Barlyq jaǵynan joǵary daıyn­dyqpen kelgen Qyzylorda qalasyndaǵy hımııa-bıologııa baǵytyndaǵy Nazar­baev zııatkerlik mektebiniń qazaq tili men ádebıeti pániniń muǵalimi Gúlzat Shyntasova bas júldeni jeńip aldy. Birinshi orynǵa L.N.Gýmılev atyn­daǵy EUÝ magıstranty Dana Tal­ǵatbek ıe bolsa, kelesi oryndardy Shym­kent qalasyndaǵy J.Táshenov ýnıversıtetiniń magıstranty Balnur Baltabaıqyzy, kókshetaýlyq Sholpan Mahambetova men «Astana aqshamy» gazetiniń sholýshysy Qalıakbar Úsem­han ózara bólisti. Bulardan basqa belsendilik tanytqan tórt úmitker Alǵyshatpen marapattaldy.