Túri basqa bolǵanymen, tilegi bir ózge etnos ókilderiniń Maǵjan shyǵarmalaryna asqan jaýapkershilikpen qaraǵany kóńil qýantty. Qazaqqa ǵana tán dybystardy taza aıtqan 25 qatysýshynyń barlyǵy Maǵjan poezııasymen tereńnen sýsyndaǵany aıqyn ańǵarylyp turdy.
Maǵjan murasyn ózge etnos jastary arasynda keńinen nasıhattaý maqsatynda uıymdastyrylǵan is-shara barysynda qatysýshylar Alash arysynyń onnan asa óleńin mánerlep oqyp, kópshiliktiń yqylasyna bólendi.
Baıqaý qorytyndysynda erekshe mánerimen kózge túsken Anel Aıdaralıeva 1-orynǵa ıe bolsa, Narmına Kaıa-oǵly men Hamza Aflatýnov 2-oryndy bólisti. Danıl Polıchýk, Sevılıa Ibragımova úzdik úshtikti túıindedi.
«Qazaq ádebıetiniń máńgi sónbes juldyzdarynyń shyǵarmalaryn jastar jattap ósýi kerek. Sonda ǵana olardyń boıynda elge degen qurmet arta túsedi. Maǵjan aqynnyń murasy qaı kezde de óziniń qundylyǵyn joımaıdy. Sol úshin de ózge etnos ókilderi arasynda osyndaı baıqaý uıymdastyrýdy jón kórdik. Aldaǵy ýaqytta da Alash arystarynyń shyǵarmashylyǵyn keıingi tolqyn arasynda nasıhattaý jumystaryn jalǵastyra beremiz», deıdi oblys ákimdigi jastar saıasaty máseleleri basqarmasynyń basshysy Jomart Zulpyhar.
Jambyl oblysy
