Sýretterdi túsirgen – Erlan OMAR, «EQ»
Kórmeniń ashylý saltanatynda Kólik vıse-mınıstri Sátjan Ablalıev, «Jarnama, dúnıejúzilik jol qaýipsizdigi» qaýymdastyǵynyń tehnıkalyq dırektory Patrık Malıja jáne «Qazaqstannyń avtojolaýshylar zańdy tulǵalar birlestigi» qaýymdastyǵynyń prezıdenti Baǵlan Baımaǵanbetov sóz sóılep, is-sharany uıymdastyrýdyń negizgi maqsattary týraly aıtyp berdi.
Kórmede Qazaqstan, Reseı, Germanııa, Túrkııa, AQSh, Qytaı elderinen 100-den astam qatysýshy jol qurylysy, sonymen qatar qaýipsizdik jáne avtomobıl joldaryn sıfrlandyrý salasyndaǵy zamanaýı ǵylymı jáne tehnıkalyq ázirlemelerin kópshilik nazaryna usynady.
«Avtojol jelisin damytý jáne odan ári jetildirý kún tártibindegi basym mindet bolyp tabylady. Búgingi tańda elimizdiń jol sharýashylyǵy aldynda negizgi mindetter aıqyndaldy. Atap aıtqanda, avtojoldardyń paıdalaný jaı-kúıin qamtamasyz etý jáne olardyń sapasyn arttyrý, zamanaýı jol ınfraqurylymyn qurý, joldardaǵy qaýipsizdikti jáne avtomobıl qozǵalysyn tıimdi ári pármendi basqarý, sondaı-aq olardy jazǵy jáne qysqy kútip-ustaýdyń talap etiletin deńgeıin qamtamasyz etý kerek. Bul mindetterdi sheshý úzdik álemdik tájirıbeni, uıymdastyrýshylyq, basqarýshylyq jáne tehnıkalyq sheshimderdi tartýdy talap etedi», dedi Kólik mınıstriniń orynbasary.
Resmı bólimnen keıin Kólik mınıstrligi men PIARC Dúnıejúzilik jol qaýymdastyǵy basshylyǵy ekspozısııany aralady. Kórme barysynda Qazaqstan jol ǵylymı-zertteý ınstıtýtynyń uıymdastyrýymen «Innovasııalar men ınfraqurylymnyń qıylysy: jol salasyn damytý formýlasy» taqyrybynda halyqaralyq ǵylymı-praktıkalyq konferensııa ótti. Onda avtomobıl joldarynyń ınnovasııalary, sapasy, qaýipsizdigi jáne damýyna qatysty ózekti máseleler qaraldy. Konferensııa jumysyna IIM, PIARC Dúnıejúzilik jol qaýymdastyǵy, oqý oryndary, Qazaqstan, QHR, Mońǵolııa jáne Belarýs, AQSh, RF jáne basqa da elderdiń ǵylymı-zertteý jáne jol uıymdarynyń ókilderi qatysty.
Aıta keterligi, QazjolǴZI Kópirler men jol ınfraqurylymyn basqarýdyń sıfrlyq júıeleri, jol materıaldarynyń sapasyn baqylaý júıeleri sııaqty IT-ınnovasııalardy ázirleýge jáne engizýge belsendi qatysyp keledi. Sonymen qatar ınstıtýtqa avtojol salasynyń normatıvtik-quqyqtyq aktileriniń «Infozhol» elektrondyq bazasyn ózektendirý boıynsha jaýapkershilik júktelip otyr. Bazada 1,2 myńnan astam qujat bar.
Sondaı-aq kórmege avtojoldardyń sapasyn jaqsartý úshin sıfrlyq tehnologııalardy engizýmen aınalysyp jatqan Kólik mınıstrligine qarasty Jol aktıvteri sapasynyń ulttyq ortalyǵy jáne joldardy salý, rekonstrýksııalaý, jóndeý, sonymen birge jol boıyndaǵy servıs obektilerin damytýǵa jaýapty «QazAvtoJol» ulttyq kompanııasy qatysyp jatyr.
