Foto: Vedomstvo. Telegram
Aýyr atletıka: Meksıkanyń Gvadalahara qalasynda jasóspirimder arasynda ótken álem chempıonatynda Edige Emberdi (81 kg) qos saıysta 336 (145+191) kelini eńserip, álem chempıony atansa, qyzdar arasynda Aısamal Sansyzbaeva (87 kg) 250 kg kórsetkishpen kúmis júlde oljalady.
Nysana kózdeý: Qatar astanasy Dohadaǵy Álem kýboginde Ásem Orynbaı stend atýdyń skıt baǵdarlamasynda 51 ball jınap, jalpy esepte top jardy.
Mánerlep syrǵanaý: Rahat Bralın 20 jyldan astam tarıhy bar Estonııadaǵy Tallinn Trophy halyqaralyq týrnırinde kúmis júlde jeńip aldy. Ol qysqa baǵdarlamada – 65.18, erkin baǵdarlamada 128.90 upaı jınap, jalpy esepte 194.08 upaımen úshinshi satyǵa turaqtady.
Júzý: Taılandtyń Phýket qalasynda jasóspirimder arasynda eskekaıaqpen júzýden VI Azııa chempıonatynda otandasymyz Insar Qusanov 100 metrge júzýde kúmis júldege qol jetkizdi.
Ýshý: AQSh-tyń Dallas qalasyndaǵy ýshýdan 16-shy álem chempıonatynda Ulttyq qurama sportshylary 4 medal jeńip aldy. Naqty ataǵanda, Nursultan Tursynqulov (+90 kg) – kúmis, Beksultan Qoskenov (65 kg), Islam Karımov (56 kg) jáne qyzdar arasynda Aqnıet Marat (75 kg) qola júlde ıelendi.
Shahmat: Italııanyń Montesılvano qalasynda ótken jastar arasyndaǵy klassıkalyq shahmattan álem chempıonatynda úsh otandasymyz júldegerler qatarynan kórindi. 18 jasqa deıingi erler arasynda Aldııar Ańsat jáne 16 jasqa deıingi oıynshylar ishinde Alýa Nurmanova 3-orynǵa taban tirep, qola júldelerdi alsa, 14 jasqa deıingi qyzdar arasynda Elnaz Qalıahmet kúmis medal enshiledi.
Konkımen júgirý: Italııada alaýy tutanǵan konkımen júgirýden jastar arasyndaǵy Álem kýboginiń alǵashqy kezeńinde Qazaqstan sportshylary úsh medal oljalady. Neo-senor dıvızıonynda Qazaqstan qyzdar quramasy (Margarıta Artemeva, Arına Ilıashenko, Alena Lıfatova) kúmis júlde enshilese, dál osy sanatta myń metrge jarysta Inessa Shýmekova qola júldeger atandy. Al jastar arasyndaǵy komandalyq synda (Krıstına Shýmekova, Alına Shýmekova, Marııa Degen úshtigi) qyzdar quramasy kúmis medal jeńip aldy.
