Foto: primeminister.kz
Kezdesýde saýda, ınvestısııa, ónerkásip, energetıka, aýyl sharýashylyǵy, kólik, logıstıka, mádenıet jáne basqa da salalardaǵy memleketaralyq yntymaqtastyqtyń keń aýqymdy máseleleri talqylandy. Álıhan Smaıylov atap ótkendeı, qazirgi ýaqytta Qazaqstan men Qytaıdyń ekijaqty taýar aınalymy joǵary kórsetkishterge qol jetkizýde. Máselen, ótken jyly atalǵan kórsetkish artyp, $24,2 mlrd-ty quraıtyn úlken nátıjege jetti, bıyl da qarqyndy ósý jalǵasýda.
«10 aı ishinde ózara saýda-sattyq taǵy 24% ósti. Osyndaı qarqynmen biz jaqyn arada eki eldiń Memleket basshylary belgilegen taýar aınalymyn $40 mlrd-qa deıin ulǵaıtý jónindegi maqsatqa qol jetkize alamyz dep sanaımyn», degen Á.Smaıylov Qazaqstan men Qytaıdyń taýar aınalymy byltyr 35%-ǵa artyp, 24,2 mlrd AQSh dollaryna jetkenin aıtty.
Condaı-aq Úkimet basshysy 10 qarashadan bastap kúshine engen vızasyz rejım Qazaqstan-Qytaı qarym-qatynastarynda jańa taraý ashatynyn atap ótti. «Bul shara iskerlik baılanystardy yntalandyrýǵa, saýdany jeńildetýge, ózara ınvestısııalardy arttyrýǵa jáne týrızmdi damytýǵa aıtarlyqtaı áser etedi. Bul, ásirese, aldaǵy «Qytaıdaǵy Qazaqstan týrızmi jyly» aıasynda ózekti», dedi.
Úkimet basshysy ındýstrıalızasııa jáne ınvestısııa boıynsha birlesken Qazaqstan-Qytaı jobalarynyń tizbesin keńeıtýdiń, 2026 jylǵa deıingi Saýda-ekonomıkalyq yntymaqtastyq baǵdarlamasyn iske asyrý jónindegi Jol kartasyna qol qoıýdyń, sondaı-aq ımporttyq-eksporttyq taýarlardy ózara kýálandyrý týraly kelisimdi jańartýdyń mańyzdylyǵyna toqtaldy. Qazaqstannyń aýyl sharýashylyǵy ónimderiniń taýar aınalymyn arttyrýǵa, Qytaıǵa eksportty arttyrýǵa jáne AО́K salasynda birlesken qaıta óńdeý jobalaryn júzege asyrýǵa múddeli ekenin jetkizdi. Sonymen qatar ol tranzıttik-kóliktik ózara is-qımyl erekshe mańyzǵa ıe ekenin atap ótti. Búginde Qytaıdan Eýropaǵa jóneltiletin taýarlardyń 85%-ǵa jýyǵy Qazaqstan arqyly tasymaldanady. Osyǵan baılanysty respýblıka ósip kele jatqan suranysty tolyq qamtamasyz etý maqsatynda ınfraqurylymynyń ótkizý qabiletin arttyrý boıynsha belsendi sharalar qabyldap jatyr.
Premer-mınıstr kedendik prosesterdi jedeldetý máselesine erekshe nazar aýdardy. Búginde eki eldiń keden qyzmetteri shekaradaǵy avtomobıl ótkizý beketteriniń ótkizý qabileti men jumys ýaqytyn ulǵaıtý týraly kelisimge keldi. Atap aıtqanda, «Nur Joly – Qorǵas» ótkizý beketi táýlik boıy jumys isteı bastasa, qalǵan avtokólik beketteri 12 saǵattyq 7 kúndik jumys kestesine kóshti.
«Sıfrlandyrý men prosesterdi avtomattandyrýdyń arqasynda shekaradan ótý ýaqyty qysqardy. Osy baǵyttaǵy jumystardy jalǵastyrý mańyzdy. Qazaqstan Úkimeti Qytaımen barlyq salada tolyq aýqymdy jáne ózara tıimdi yntymaqtastyqty damytýǵa daıyn», dedi Á.Smaıylov.
Úkimet basshysy eki el arasyndaǵy áýe reısteriniń sanyn odan ári arttyrýdyń jáne energetıka salasyndaǵy iri jobalardy júzege asyrýdyń mańyzdy ekenin atap ótti. Olardyń qatarynda «Qazaqstan-Qytaı» munaı qubyrynyń ótkizý qabiletin keńeıtý, Shymkenttegi munaı óńdeý zaýytyn jańǵyrtý jáne t.b. bar.
QHR Memlekettik keńesi Premeriniń orynbasary Dın Sıýesıan bıylǵy jyl Qazaqstan men Qytaı úshin óte jemisti bolǵanyn atap ótip, QHR barlyq ózara tıimdi salalardaǵy yntymaqtastyqty arttyrýǵa daıyn ekenin aıtty.
«Qytaı men Qazaqstan jaqyn kórshi, jaqsy dos jáne seriktester. Búginde eki el de óz damýy men jandanýynyń mańyzdy kezeńinde tur. Qıly ózgerister jaǵdaıynda Qytaı men Qazaqstan úlken synaqtarǵa betpe bet keldi. Sondyqtan biz yntymaqtastyq rýhynda barlyq negizgi máseleler boıynsha ózara qoldaýdy kúsheıtýimiz kerek. Qytaı tarapy burynǵydaı Qazaqstandy jáne damý men órkendeýge baǵyttalǵan barlyq kúsh-jigerdi tabandy túrde qoldaıtyn bolady», dedi Dın Sıýesıan.
