Aldyńǵy arba qalaı júrse, sońǵy arba solaı júredi deýge bolatyndaı. Kóksý aýdanyna qarasty Muqanshy aýyldyq okrýgine tıesili shaǵyn ǵana Jetijal aýylynyń myńnan astam turǵyny bar. Tútini túzý ushqan aıadaı eldi mekenniń abyroıyn eki qabatty bilim ordasy asqaqtatyp tur. Jaqynda ǵana óńir kóleminde júzdegen mekteptiń ishinde oq boıy oza shaýyp, bilim aıdynyndaǵy jan-jaqty qabiletimen top jaryp, «Úzdik aýyl mektebi – 2023» baıqaýynyń jeńimpazy atandy. Mektep dırektory Ádilet Nurǵalıev bul dodada áriptesterimen birlese jańashyl ıdeıalarymen kópti tańdaı qaqtyrǵan. Alaqandaı mekteptiń ár saladaǵy jetistikteri úlken bilim ordalaryna ónege bolyp otyr.
«Meniń osy bilim ordasyna kelgenime 5 jyl boldy. Almatyda oqyp, jumys istegennen keıin kishkentaı aýylǵa úırenisý óte qıyn. Degenmen týǵan topyraqqa degen mahabbatym osynda jetelep keldi. Áýelde 30-ǵa tolmaǵan mamandy kóbi áli biliktiligi tómen dep sanaıtyny anyq. Áıtse de ujymnyń tilin taýyp, sapaly bilim berý tásiline kóshtik. Jańadan mamandar aldyq, tapshy kadrlardy Taldyqorǵannan arnaıy qatynap isteýge kóndirdik. Mektepke qajetti zattardy ujymmen aqyldasyp, birlesip satyp aldyq», deıdi Á.Nurǵalıev.
Onyń aıtýynsha, jańadan kelgen jas maman ózi qyzmet etetin bilim ordasyna shama-sharqynsha syılyq jasaıdy eken. Sol arqyly ujym osy kúnge deıin mektep ishin bezendirip, synypty oqýshylarǵa qajet oqý quraldarymen tolyqtaı toltyryp úlgergen. Tipti ashana qabyrǵasyna ádemi kartınalar jabystyryp, mekteptiń kire-berisine oqýshylardyń jetken jetistikterin kórsetetin materıaldardy maqtanyshpen ilip qoıǵan. Ár balany esimimen atap, bilim deńgeıin únemi baqylaýda ustaıtyn dırektordiń isi kóńilge qýanysh syılaıdy.
Jalpy, Jetijal mektebiniń irgesi 1971 jyly qalanǵan. Jarty ǵasyrdan asqan nysanǵa 2013 jyly kúrdeli jóndeý jumystary júrgizilgen. Bilim ordasynda 19 kabınet, 320 oryndyq bar. Zaman talabyna saı barlyq qural-jabdyqpen jabdyqtalǵan. Jetpegenin aýyl azamattary men ata-analardyń kómegimen tolyqtyrǵan. Búginde mektepte 27 muǵalim, 16 kishi qyzmetker jumys isteıdi. «Dıplommen – aýylǵa» baǵdarlamasy boıynsha 7 muǵalimge kóterme járdemaqy jáne úı berilgen. Sonyń biri matematıka pániniń ustazy Altynaı Aýbek qazir keler jylǵy túlekterdi ulttyq biryńǵaı testileýge daıarlap jatyr.
«Oqýshynyń jan syryna úńilip, onyń tabıǵatyna saı áreket etý – ustazdyń mindeti. Matematıka – eń qıyn pánderdiń biri, áıtse de shákirtterimiz birinen biri qalmaı eńbektenedi. Men baǵaǵa ádilmin, 4-pe, 4-in qoıyp beremin, kóterme baǵa qoımaımyn. Muny dırektorymyz da qoldap otyr. Aýyldan túlegen jastardyń kóbi memlekettik grantqa túsip, abyroıymyzdy kóterip júr. Osy aýyldan úı alyp, memlekettiń qoldaýymen jumysymyz da júıelendi», deıdi A.Aýbek.
Aıtpaqshy, byltyrǵy, arǵy jylǵy túlekterdiń 80 paıyzy memlekettik grantty utyp alǵan. Tipti osy mektepti bitirip, dıplommen kelgen jas mamandar da bar. Mysaly, bıyl 11-synypta 12 oqýshy oqysa, onyń 1-eýi Altyn belgi, 4-eýi – úzdik attestatqa úmitker. Respýblıkalyq, oblystyq, aýdandyq bilim báıgelerinde, sporttyq jarystarda jetijaldyq órender tuǵyr tórinen jıi kórinedi.
Mektepte ata-analarmen jumys isteıtin arnaıy ortalyq bar. Onda pedagogter apta saıyn jınalys ótkizedi. Tálimgerler balalarynyń oqý deńgeıin ǵana baıandap qoımaı, psıhologııalyq sabaqtar da júrgiziledi. Ártúrli tanymdyq oıyn oınatyp, bala, ata-ana, muǵalim arasyndaǵy úshtik baılanysty nyǵaıtýǵa kúsh salady. Bul óz kezeginde syrttan kelgen qaýipti aqparattarǵa tosqaýyl bolyp, oqýshynyń jansaraıyn ashady.
«Ustaz bolý – úlken jaýapkershilik. Jetijal mektebinde meniń 3 balam oqıdy. Árqaısysy bir álem, sol álemge jol taba bilgen pedagogterge alǵysym sheksiz. Dırektordyń eńbegi zor, bilikti ustazdardyń sabaq berý ádisi kóńil súıindiredi. Ásirese ata-analarmen ashyq suhbatqa túsip, balamyzdyń biz bilmeıtin qyryn ashyp jatyr», deıdi aýyl turǵyny Araı Ermekqyzy.
Eń ǵajaby, oqýshylar mektep syrtyna kóshet egip, jeke saıabaǵyn jasaǵan eken. Apta saıyn ár synyp sý quıyp, kútip baptaıdy. Kóktem kele qulpyra kókteıtin jemis aǵashtary, qyzyldy-jasyldy gúlder aýyl turǵyndarynyń keshke jaqyn serýendeıtin mekenine aınalǵan. Osydan-aq bilim ordasynyń jaı-kúıine tánti bolýǵa bolady. Úzdik aýyl mektebiniń áli de shyǵar bıigi joǵary ekenine senemiz.
