Bıyl úshinshi ret ótkizilip otyrǵan semınardyń basty maqsaty – restavrator, qor saqtaýshy mamandardyń biliktiligin arttyrý jáne zamanǵa saı jańa tehnologııalardy meńgerip, ortaq tájirıbe almasýǵa múmkindik týdyrýmen qatar, jazba muralardy bolashaqqa aman jetkizýdiń amal-aılasyn talqylaý.
Bul retki bas qosýdyń máni týraly baıandaǵan Qoljazbalar jáne sırek kitaptar ulttyq ortalyǵynyń dırektory Jandos Boldyqovtyń aıtýyna qaraǵanda, mekeme qazirgi tańda zerthanalyq restavrasııa jáne konservasııa jumystarynyń tolyq sıklin atqara alatyn deńgeıge jetken. Iаǵnı zerthana qyzmetkerleri keıingi jyldary biliktiligin arttyrý úshin Túrkııa, Reseı, Iran, Armenııa, Koreıa sekildi elderge baryp tájirıbe almasypty. Onyń syrtynda ortalyq mamandary otandyq hám halyqaralyq deńgeıde uıymdastyrylǵan semınarlarǵa turaqty qatysyp, qajet jaǵdaıda baıandama jasaıtyn dárejege jetken. Bular bul joly shetelden úırengen bilimi men tájirıbesin otandyq áriptesterimen bólispek eken.
Qazirgi tańda Qoljazbalar jáne sırek kitaptar ulttyq ortalyǵynyń Restavrasııa bóliminiń mamandary kóne qoljazbalar men sırek kitaptardy tazalaý, dezınfeksııa jáne dezınseksııa jasaý, qalpyna keltirý, túpteý, konservasııalaý jumystaryn sapaly atqarý ústinde. О́ıtkeni zerthana AQSh, Ulybrıtanııa, Koreıa, Italııa, Japonııa, Germanııa sııaqty memleketterde óndirilgen ozyq tehnologııamen jabdyqtalǵan. Nátıjesinde, jazba qujattardy qalpyna keltirý zerthanasy iske qosylyp, restavratorlar zamanaýı restavrasııalyq materıaldardy paıdalaný arqyly qaǵaz qujattardy jańǵyrtý jumystaryn júıeli júrgizip otyr. Atap aıtar bolsaq, ataqty Maral ıshannyń Kenesary hanǵa tartý etken qasıetti Quran kitabyna ortalyq mamandary restavrasııa jumystaryn júrgizip, ony eki aı kóleminde tolyq qalpyna keltiripti.
Sózimizdi túıindep aıtar bolsaq, semınar barysynda arhıvtik qujattardy qalpyna keltirý jáne konservasııalaý úshin zamanaýı jabdyqtardy paıdalaný týraly sheberlik sabaqtary ótip, eń bir paıdaly sát – jıynǵa qatysýshylar sheteldik mamandardyń beıne baıandamalaryn tyńdady.
