«Barshańyzdy «Altyn sapa», «Paryz», «Qazaqstannyń úzdik taýary» baıqaýlarynyń óz máresine jetýimen quttyqtaımyn! Biz jyl saıyn osy saltanatty jıynda el damýyna eleýli úles qosqan kásipkerlerge qurmet kórsetemiz. Bul – talaı jyldan beri jaqsy dástúrge aınalǵan mańyzdy is-shara. Qazir Qazaqstanda bıznes salasy qarqyndy damyp keledi. Buǵan memleket tarapynan barlyq jaǵdaı jasalyp jatyr. Shaǵyn jáne orta bıznestiń ishki jalpy ónimdegi úlesi 36 paıyzdan asty. Bul – shyn máninde, joǵary kórsetkish. Osy salada jumys isteıtin adamdardyń sany 4,3 mıllıonǵa jetti. Iаǵnı eńbekke jaramdy azamattardyń 45 paıyzy degen sóz», dedi Q.Toqaev.
Prezıdenttiń aıtýynsha, ındýstrııalandyrý jumysy sońǵy jyldary joǵary qarqynmen júzege asyrylyp keledi.
«Byltyr óńdeý ónerkásibiniń eksporty 26 mıllıard dollardan asty. Bul – rekordtyq kórsetkish. О́tken jyly osy salaǵa 1,5 trıllıon teńge ınvestısııa tartyldy. О́ńdeý kásiporyndaryn damytýǵa barynsha jaǵdaı jasaldy. Sonyń nátıjesinde respýblıkalyq bıýdjetke túsetin salyq 5 ese artty. Osylaısha, bıznes ókilderi memlekettiń senimdi seriktesine aınaldy.
Biz bıyl jańa ekonomıkalyq úlgige kóshe bastadyq. Eń aldymen, ekonomıkamyzda ádildik bolýǵa tıis. Sondyqtan birqatar mańyzdy máselege nazar aýdarý qajet», dedi el Prezıdenti.
