Foto: ashyq derekkóz
Eńbek kodeksiniń 82-baby «Aýysymishilik jáne arnaıy úzilister» dep atalady. Dese de atalǵan bapta ystyq ne sýyq mezgilde ashyq aýada, keńsede isteıtin qyzmetkerlerdiń qansha gradýs aıazda jumysqa shyqpaýy jóninde naqty aqparat kórsetilmegen.
Atalǵan bapta:
«Jyldyń sýyq nemese ystyq mezgilinde ashyq aýada, jylytylmaıtyn jabyq úı-jaılarda jumys isteıtin, sondaı-aq tıeý-túsirý jumystarynda isteıtin jumyskerlerge jylyný ne salqyndaý jáne tynyǵý úshin jumys ýaqytyna qosylatyn arnaıy úzilister beriledi. Jumys berýshi jumyskerlerdiń jylynýyna, salqyndaýyna jáne tynyǵýyna arnalǵan úı-jaılardyń jabdyqtalýyn qamtamasyz etýge mindetti», dep jazylǵan.
Elimizdiń birqatar óńirlerindegi aýa raıynyń qolaısyzdyǵy men aıazdy tempetatýranyń artýyna baılanysty «qysqartylǵan jumys kúni» nemese qashyqtan jumys isteý máselesi ózekti bolyp tur. Degenmen elimizdiń eńbek zańnamasynda qys mezgilindegi aıazdy aýa raıyna baılanysty qandaı jaǵdaılarda jumys toqtatylatyny týraly tikeleı nusqaýlyq joq.
«Jumys berýshi óz qyzmetkerlerin jylytýǵa, salqyndatýǵa jáne demalýǵa arnalǵan bólmemen qamtamasyz etýge mindetti. Sondaı-aq kún tártibiniń erejelerinde aýa raıyna baılanysty jumys kúnin jáne onyń uzaqtyǵyn qysqartýdy qarastyrýǵa bolady. Muny jumys berýshiniń ózi jasaıdy», delingen Eńbek jáne halyqty áleýmettik qorǵaý mınıstrliginiń resmı jaýabynda.
Qystaǵy qolaısyz aýa raıy, boran men tuman negizinen syrtta jumys isteıtin jumysshylardyń isine kóp kedergi. Ásirese, qurylysta isteıtin alpınıster men kran tizginindegi jumysshylardyń qyzmeti aýa raıyna baılanysty qatań qadaǵalanady. Tehnıkalyq reglamentke saı jel jyldamdyǵyna baılanysty atalǵan eki maman ıeleriniń jumysyn jıi toqtatýǵa týra keledi.
