Foto: gov.kz
«Eger júk kóligi ıeleri zańnama talaptaryn saqtasa, durys bolar edi. Alaıda, talaptar jıi buzylyp turady. Nátıjesinde bıýdjetke orasan zııan keltiredi. Mysaly, Batys Qazaqstan oblysynda joldyń qurylysyna kiristirilgen aýyr júk kólikteri jańa joldardy qalaı buzǵanyn kórip otyrmyz», dedi kólik salasyna jaýapty mınıstr.
Qordalanǵan máseleni sheshý úshin mınıstrlik 2024 jyly qalalardyń kiris jáne shyǵys bólikterine beınekameralar ornatýdy bastamaq. Olar avtomatty túrde artyq salmaq úshin aıyppul salady. Sonymen birge 220 kamerany «Sergek» beınebaqylaý júıesimen biriktirý josparǵa alynǵan.
Sondaı-aq bólinbeıtin iri kólemdi júkterdi tasymaldaýǵa resmı arnaıy ruqsattar berý jáne samosvaldardyń joldarmen qozǵalysyn shekteý tetikteri pysyqtalyp jatyr.
«Álemniń kez kelgen jerinde karerlik aýyr júk kólikteriniń jalpyǵa ortaq paıdalanylatyn avtojoldarmen júrýine tyıym salynady. Qazaqstan, bálkim, mundaıǵa jol bergen jalǵyz el. Biz atalǵan shekteýlerdi 2023 jyldan bastap iske qosqymyz keldi. Deı turǵanmen, naryq qatysýshylary az da bolsa ýaqyt berýdi suraǵan bolatyn. Sondyqtan aýyr karerlik júk kólikterine 2025 jyldyń aıaǵy men 2026 jyldyń basynda Qazaqstannyń jalpyǵa ortaq paıdalanylatyn avtojoldarymen júrýine tyıym salynady», dep atap ótti Marat Qarabaev.
Sonymen qatar eger mınıstrliktiń usynysy Úkimet pen Parlamentte qoldaý tapsa, tasymaldaýshylar tóleýge tıisti arnaıy ruqsaty bolǵan kezde belgili bir shegine deıin artyq júkterdi tasymaldaýǵa múmkindik beretin norma engiziledi. Atalǵan sheshim jergilikti jerlerde oryn alýy múmkin sybaılas jemqorlyq táýekelderin joıýdy kózdeıdi.
