Palata spıkeri jastardy qoldaý memlekettik saıasattyń basym baǵyttarynyń biri ekenin atap ótti. Elimizde Memleket basshysynyń bastamasymen keshendi reformalar iske asyrylyp, strategııalyq baǵdarlamalar men memlekettik jobalar qolǵa alyndy.
«Prezıdent Qasym-Jomart Toqaev reformalarynyń negizgi maqsaty – Qazaqstandy ádiletti, demokratııalyq jáne ınklıýzıvti memleket retinde qalyptastyrý. Bul baǵytta aýqymdy jumys atqarylyp jatyr. Prezıdenttik jastar kadrlyq rezervi jasaqtalyp, talantty, bilimdi, bilikti jastarǵa memlekettik qyzmetke kelýdiń jańa bir joly ashyldy. Májilis jáne máslıhat depýtattarynyń qatarynda jastardyń bolýyn qamtamasyz etetin normalar da qabyldandy. Osy rette Senattyń zań shyǵarý qyzmetine apparattaǵy jas qyzmetkerler de úlken úles qosyp otyrǵanyn atap ótken jón», dedi Máýlen Áshimbaev.
Sondaı-aq Senat tóraǵasy memlekettik qyzmet júıesin damytý, bıýrokratııany azaıtý jáne kásibı biliktilikti arttyrý mańyzdy mindetterdiń biri ekenin aıtyp, bul rette merıtokratııa qaǵıdatyn keńinen qoldaný qajettigine nazar aýdardy.
«Merıtokratııa qaǵıdaty kez kelgen eńbekqor, patrıot azamattyń óz salasynda ósýine jol ashady. Bul baǵytta Senat apparatynda júıeli jumys júrgizilip keledi. Biz joǵary laýazymdarǵa taǵaıyndaý kezinde negizinen ishtegi kadrlarǵa basymdyq beremiz. Osy jerdegi jınaǵan tájirıbelerińiz ben alǵan bilimderińiz aldaǵy ýaqytta qaıratker tulǵa bolyp qalyptasýlaryńa úlken septigin tıgizedi dep senemin», dedi Palata spıkeri.
Sonymen qatar Máýlen Áshimbaev belsendi jastardy qoldaýǵa arnalǵan, volonterlik negizde jumys isteıtin Senat janyndaǵy Jas sarapshylar klýby men Taldaý mektebiniń qyzmetine de nazar aýdardy. Aıta keteıik, aldaǵy qańtar aıynyń ortasynda Taldaý mektebiniń úshinshi kezeńi bastalady.
Kezdesý barysynda jas memlekettik qyzmetshiler de óz pikirlerin bildirip, qolǵa alynǵan jobalardy iske asyrýǵa jáne apparat jumysynyń tıimdiligin arttyrýǵa qatysty ıdeıalary men usynystaryn aıtty.
