О́tken jyly munda «Shuǵyl balalar hırýrgııasy» jobasy iske qosyldy. Jaqynda atalǵan joba aıasynda akademık S.Doleskıı atyndaǵy Reseı medısınalyq úzdiksiz kásiptik bilim berý akademııasynyń kafedra meńgerýshisi, medısına ǵylymdarynyń doktory Iýrıı Sokolov naýqas balalarǵa kúrdeli bes operasııa jasady. Reseılik hırýrg buǵan deıin Almaty, Aqtaý, Semeı qalalarynda sheberlik saǵatyn ótkizgen eken. Al Atyraýǵa alǵash ret kelýi.
«Sheberlik saǵaty kúrdeli operasııalardy zamanaýı tehnologııanyń kómegimen jasaý, jergilikti mamandardyń biliktiligin arttyrý maqsatynda ótkizildi. Munda zamanaýı medısınalyq jabdyqtar bar. Bes operasııa jasadym. Atyraýlyq dárigerlerge ár operasııanyń kúrdeliligi, mańyzy jóninde tájirıbemmen bólisip, tolyq aqparat berdim. Jalpy, medısına salasy jańashyldyqty talap etedi. Aldaǵy ýaqytta aýrýhanalar jańa tehnologııalarmen tolyqtyrylyp, dárigerler bilimin udaıy jetildirgeni jón», deıdi Iý.Sokolov.
Oblystyq balalar aýrýhanasynyń dırektory N.Aıtmuhanbetovtiń aıtýyna qaraǵanda, reseılik balalar hırýrgi emdeý tásilderin jergilikti dárigerlerge úıretken. Operasııanyń bári sátti bolǵan. Qazir operasııa jasalǵan balalardyń jaǵdaıy qalypty, dárigerlerdiń jiti baqylaýyna alynǵan.
«Kúrdeli operasııa 3-15 jastaǵy balalardyń asqazan-ishek joldary dıagnozymen jasaldy. Bir balanyń gemolıtıkalyq anemııasy bar. Operasııa kezinde kókbaýyr kıstasy alynyp tastaldy. Taǵy bir balaǵa ót joldarynyń aqaýy dıagnozy qoıylǵan. Balalardyń bári operasııadan keıingi ońaltý kezeńinen ótip jatyr», deıdi balalar aýrýhanasy hırýrgııa bóliminiń meńgerýshisi Gúlmıra Merǵazıeva.
Al «Qazaqstan Respýblıkasy Prezıdenti Is basqarmasynyń medısınalyq ortalyǵy» aýrýhanasynyń dárigerleri, kardıohırýrg Álibek Toıbaev, kardıoanestezıolog Aqerke Bekseıitova jáne perfýzıolog Jánibek Áshirov sheberlik dárisin ótkizdi. Elordalyq dárigerler MIDCAB ádisimen bes operasııa jasady.
«MIDCAB – júrektiń aldyńǵy qabyrǵasynda ornalasqan úlken koronarlyq tamyrdyń bitelýine baılanysty qoldanylatyn ádis. Bul operasııa keýdeni túgel ashpaı, júrek tusynan tesý arqyly jasalady. Koronarlyq tamyrdyń bitelýi – júrek talmasyna ushyratatyn negizgi sebeptiń biri. Al MIDCAB ádisimen operasııa jasalǵan naýqas birneshe kúnnen soń tez qalpyna keledi», deıdi Á.Toıbaev.
Onyń aıtýynsha, MIDCAB ádisi kúndelikti tájirıbede qoldanýǵa jeńil ári naýqastardyń stasıonarda em alý ýaqytyn qysqartady. Sondaı-aq kúrdeli kardıologııalyq operasııalardan saqtanýǵa múmkindik beredi.
Atyraý oblysy
