Shóbi shúıgin, topyraǵy qunarly, tabıǵaty jaıly óńirde mal basynyń sany artyp keledi. О́tken jyldyń 11 aıynda Almaty oblysynda 697 myń iri qara maly esepke kirse, onyń 20 paıyzy nemese 137 myń basy Jambyl aýdanynyń enshisinde. Qoı men eshkiniń 42 paıyzy nemese 1 mln 088 myń basy, 233 myń bas jylqynyń 49 myń basy, 7 597 bas túıeniń 1752 basy nemese 23 paıyzy osy aýdanǵa tıesili. Tiri salmaqtaǵy mal men qus eti boıynsha 11 aıda 20468 tonna et óndirilip, aldyńǵy jylmen salystyrǵanda 1,1 paıyzǵa artqan.
Mal ósirip, egin oryp otyrǵan aýdanda sý únemdeý tehnologııasyn keńinen engizýge jiti kóńil bólinip otyr. Mal basyn jetkilikti mólsherde jemshóppen qamtamasyz etýde aýdandaǵy esepte turǵan 26 myń gektar sýarmaly egistiktiń tek 4,3 myń gektary ǵana jańbyrlatyp sýarý ádisterin paıdalanady, bul sýarmaly egistik jerdiń 16 paıyzyn ǵana quraıdy. Sondyqtan aldaǵy jyldary bul kórsetkishti ulǵaıtý máselesi kún tártibinde turǵanyn Jambyl aýdanynyń ákimi Nurlan Ertasuly aıryqsha atap ótti.
Buǵan qosa, jaıylymdyq jerlerdi keńeıtý, ósirilgen ónimdi qaıta óńdeý men ótkizý, aýyl arasyn qoǵamdyq kóliktermen qamtamasyz etý, «Jaıly mektep» jobasynyń júzege asyrylýy syndy áleýmettiń áleýetin jaqsartý jolynda atqarylyp jatqan jumystar jaıyn baıandady.
«Aýyl – el besigi» degendi halqymyz beker aıtqan joq. Aýyl sharýashylyǵy salasynyń áleýeti orasan zor. Sondyqtan aýyldaǵy jaǵdaıdy jaqsarta almasaq, bárimizge syn», degen Memleket basshysy agrarlyq sala jetekshilerine úlken mindet júktegeni belgili. Osy oraıda agroónerkásip kesheninde naqty serpiliske qol jetkizý ortaq is ekendigin atap aıtqan senator Sultan Dúısembıev issapar barysynda agrarlyq aımaq sanalatyn Almaty oblysynda birqatar ózekti máseleniń baryn alǵa tartty.
«Bizdiń óńirlerge shyǵyp, el-jurtpen kezdesýdegi basty maqsatymyz – halyqtyń jaı-kúıin bilý, qordalanǵan máselelermen tanysyp, onyń sheshim tabýyna yqpal etý. El ishinde kásibin ashyp, turmysyn túzeýge betburys jasap otyrǵan azamattar az emes. Sonyń biri óz qarjysyna balyq sharýashylyǵyn ashyp, úlken isti bastap otyrǵan Baǵlan Kenjebaev syndy isker azamattardyń isi kópke úlgi. Osyndaı shaǵyn ónerkásipter kóp bolsa, bizdiń elimiz ósip-órkendeıdi. Aýyl sharýashylyǵy eńbekkerlerimen kezdesýlerde sýbsıdııaǵa qol jetkizý, sýarmaly egistik jerler men jaıylym tapshylyǵy syndy birqatar problemanyń bary aıtyldy. Byltyr Senatta 92 zań qabyldansa, sonyń 10-y aýyl sharýashylyǵy boıynsha qabyldandy. Sol sebepti turǵyndar tarapynan aıtylǵan usynys-pikirlerdiń aıaqsyz qalmaýy basty nazarǵa alynady», dedi S.Dúısembıev.
О́ńirde tórt túlikti ósirý, oǵan kútim jasaý, shalǵaı aýyldarǵa qajetti mamandar tartý, áleýmettik osal toptaǵy otbasylarǵa qoldaý kórsetý aıasynda atqarylyp jatqan jumystar jaıyn tolǵaǵan májilismen D.Qasqaraýov turǵyndar tarapynan túsken saýaldarǵa jan-jaqty jaýap qaıyrdy.
Issapar sońynda halyq qalaýlylary jylyna 45 tonna balyq etin óndirýdi kózdep, qalypty jumys istep turǵan «Almaty balyk 2050» JShS-nyń jumys yrǵaǵymen tanysty. Jalpy aýmaǵy 8 gektar jerde ornalasqan 20 basseıni ashyq aspan astynda, 38 basseıni jabyq nysanda jáne 1 ınkýbasııalyq sehta sazan, amýr, shabaq ósirýmen aınalysatyn balyq sharýashylyǵynda 15 adam eńbek etedi. Aldaǵy ýaqytta óndiristik qýatty arttyrýdy kózdegen seriktestik basshysy Baǵlan Orazáliuly ótken jyly 20 tonna balyq eti óndirilgenin tilge tıek etti.
Almaty oblysy
