Foto: aýyl turǵyndarynan
Jergilikti bılik ókilderinen alǵan aqparatqa súıensek, Qaroı, Qarashilik, Tósqaıyń, Buǵymúıiz jáne Shanaǵaty aýyldaryna kólik qatynaı almaıdy. Dál qazir «OblShyǵysJol» JShS qyzmetkerleri jeti tehnıkamen joldy ashyp jatyr. Oblys ortalyǵynan taǵy da qosymsha tehnıka jolǵa shyqqan.
Qar qursaýy kólik qozǵalysyn shektep ǵana qoımaı, shalǵaı aýyldaǵy naýqasqa asyqqan medısına qyzmetkerlerine de qol baılaý bolǵanyn aıtýymyz kerek. Oblystyq densaýlyq saqtaý basqarmasynyń málimetine súıensek, Tósqaıyń aýylynyń 71 jastaǵy turǵyny ıshemııalyq ınsýlt alǵan. Kún raıy buzylýyna baılanysty kólik qozǵalysy ǵana shektelgen joq, tikushaqtyń ushýyna da tyıym salynǵan-dy. Sondyqtan pasıentke kómek der kezinde kórsetý múmkin bolmaǵan.
Degenmen, búgin Marqakól aýdany Tósqaıyń aýylyndaǵy aýyr naýqasqa medısınalyq kómek kórsetý úshin oblystyń bas reanımatology, sanavıasııanyń feldsheri jolǵa shyqty.
«Keshe sanavıasııanyń bas reanımatology, feldsheri tótenshe jaǵdaılar departamentiniń jol talǵamaıtyn kóligimen, barlyq qural-jabdyqtarmen jabdyqtalǵan keshenmen birge jolǵa shyqqan-dy. Olar qazir Urynhaı aýylyna jetti, endi ary qaraı taǵy 65 shaqyrym joldy eńserip, pasıenttiń aýylyna barýǵa tıis. Naýqasqa barlyq kómek sol jerde kórsetiledi. Ary qaraı emin qalaı alatyny dárigerler sheshimimen anyqtalyp, aýdanaryq aýrýhanaǵa ne oblys ortalyǵyna jetkiziledi», dep málimdedi salalyq basqarmada.
Qatardaǵy kólikterdi aıtpaǵanda TJD-niń jol talǵamaıtyn kólikteri de qalyń qardan júre almaı kidirip qalǵan. Soǵan qaramastan jaýapty oryndar tabıǵattyń tosyn minezimen kúresip, joldy qardan arshý jumystary úzdiksiz júrgizilip jatyr. Osy oraıda turǵyndar da jaǵdaıǵa túsinistikpen qarap, qar qursaýynda qamalyp qalmaý úshin jolǵa shyqpaǵany abzal.
