«2023 jyl elimiz úshin mańyzdy oqıǵalarǵa toly jyl boldy. Biz negizgi saıası reformalardy aıaqtap qaldyq. Konstıtýsııalyq sot jumysyn bastady. Májilis jáne barlyq deńgeıdegi máslıhat depýtattary jańa ereje boıynsha saılandy. Alǵash ret aýdan jáne oblystyq mańyzy bar qala ákimderin saıladyq. Aýyl jáne aýdandyq mańyzy bar qala ákimderin saılaý jalǵasty. Byltyr 700-ge jýyq aýyl ákimi saılandy», dedi Memleket basshysy.
Jańa kezeńge qadam basqan Qazaq eliniń basshylyq quramyn jańartý jumystary júrip jatqany da belgili. Memlekettik qyzmette adal ári bilikti mamandar az dep aıta almaımyz. Eń bastysy, memlekettik qyzmetshiniń basty qasıetteri – naǵyz maman bolý men otanshyldyq. Muny Prezıdentimiz árdaıym aıtyp júr.
Búgingi sheneýnikter men basshylarǵa qoıylatyn basty talap – qoǵamnyń tamyryn tap basa bilýge, azamattardyń muń-muqtajyn tyńdap-túsinýge, soǵan sáıkes der kezinde nátıjeli sharalar qabyldaýǵa jáne durys sheshim shyǵarýǵa qabiletti bolýy kerek ekenin Memleket basshysy osy suhbatynda shegelep turyp aıtty. Memlekettik qyzmetshige basty qaǵıdat retinde «adam memleket úshin emes, memleket adam úshin» ekendigin jadynda berik ustaný kerek jáne ádiletti Qazaqstandy qurý ıdeıasyna adaldyǵy mańyzdy ekeni de maqalada kórsetilgen.
Árıne, memlekettiń bolashaǵy jas býynǵa baılanysty ekeni sózsiz. Sondyqtan «Júzden – júırik, myńnan – tulpar» shyqqan jastardyń jaýapty qyzmetke kelýi úshin jasalyp jatqan ıgi bastamalar bar. Mundaǵy basty mindet – memlekettik apparatty jetildirý jáne basshylardyń jańa býynyna jol ashý. Prezıdenttik kadr rezerviniń negizgi kózdegen maqsaty – ozyq oıly, básekege qabiletti mamandar, onyń ústine ultjandylyqtyń, otanshyldyqtyń ozyq úlgisin kórsetip, memleketimizdi odan ári órkendetip, táýelsizdigimizdi nyǵaıtatyn jastardy tabý. Talantty jastardyń elimizdi jańa belesterge kóterýine múmkindik berý arqyly ıntellektýaldy ult qalyptastyrý basty sharttyń biri.
Bul oraıda Memleket basshysy jastarǵa senim artyp otyrǵandyǵyn ashyp aıtqan. Jas urpaqtyń jańa ıdeıalaryn qoldaýmen qatar aǵa býynnyń tájirıbesine de súıený kerek ekendigine de toqtalyp otyr. Bul saıasat aldaǵy ýaqytta da jalǵasyn taba bermekshi.
Jastarymyz árdaıym ulttyq qundylyqtardy kózdiń qarashyǵyndaı saqtap, dáripteı bilýi kerek. Otanǵa súıispenshiliktiń ozyq úlgisin tarıhı tulǵalarymyz – uly Abaı, ult ustazy Ahmet, ǵulama ǵalym Qanysh kórsetti. Prezıdenttiń suhbatynda Qazaq eliniń tarıhynda erekshe orny bar áıgili ǵalym Qanysh Sátbaevtyń 125 jyldyǵyna qurmet kórsetý kerek ekendigi ári osyndaı tarıhı tulǵalar jalpyulttyq biregeılikti nyǵaıtýǵa zor septigin tıgizetindigi sózsiz ekendigine de toqtalyp ótken. Ǵulama oıshyldar men batyrlardyń, óner qaıratkerleriniń ǵıbratty ǵumyrlary men mol murasy búkil halqymyzǵa úlgi-ónege ekendigi dáleldeýdi qajet etpeıdi.
«Biz ozyq oıly ult retinde halqymyzdy ydyratatyn emes, biriktiretin joldy tańdap, tek alǵa qaraýymyz kerek. Jalpyulttyq qundylyqtar bárinen joǵary turýǵa tıis. Halqymyzdyń qýatyn arttyryp, tabysqa jeteleıtin osyndaı qasıetter men qundylyqtardy jan-jaqty dáriptep, urpaq sanasyna sińirý arqyly ǵana sapaly ultqa aınala alamyz», degen Prezıdent sózin barsha buqaraǵa jol nusqaǵan basty baǵyt-baǵdar dep tanýymyz, qabyldaýymyz, ustanýymyz kerek.
Altynbek NÝHULY,
Senat depýtaty
