Birinshiden, bul suhbat – jaı ǵana jyl qorytyndysy emes, Q.Toqaevtyń bılik basyna kelgennen bergi jumysynyń basty aspektileri jónindegi tereń baıandama.
Ekinshiden, suhbat memlekettik tildegi gazetke berilýi – Prezıdenttiń memlekettik tilge aıryqsha nazar aýdaratynyn, ana tilimizdiń saıası tutqaǵa aınalǵanynyń úlgisi.
Úshinshiden, zamanaýı saıası úderisterdiń qaı baǵytqa damyp bara jatqanyn qamtyp, «búginniń basty máselesi nede?» degen suraqqa dáleldi jaýap beredi.
Memleket basshysy jaýabyndaǵy kóńil aýdaratyn másele – qoǵamda kóp taralǵan Qazaqstandaǵy «qos bılik» jónindegi alypqashpa áńgime. Shyny kerek, elimizdegi eski bılik jeke ekonomıkalyq múddesin qorǵap qalý úshin memleketti qosarlana basqarýǵa tyrysqany anyq.
Olar «ózi bı, ózi qoja» kezin ańsap, memlekettik basqarý tetikterin qaıtarýǵa kúsh salǵany da ashyq aıtyldy. Degenmen bılik búginde halyqtyń basym kópshiliginiń mandaty negizinde Prezıdent Qasym-Jomart Toqaevtyń nyq qolynda.
Dıalektıkanyń «teristeýdi teristeý» degen zańy bar. Búginde eski júıeniń istegen qatelikteri men shalys qadamdaryn túzetý kezeńi ótip jatyr. «Kettiń be – qaıyrylma!» О́te durys aksıoma! Ketken saıası tulǵa saıasatqa aralaspaýǵa tıis. Osynaý kúrdeli almaǵaıyp zamanda Prezıdent bıligi nyq jáne myqty bolýy kerek. Nyq bılikpen saıası plıýralızmdi qoldaı otyryp, damý qajet.
Elimizde saıası reformalar is júzine asyp keledi. Qazaqstan permanentti saılaý kezeńinen ótti. Elimizde aýyl ákimderiniń barlyq deńgeıdegi Májilis, máslıhat depýtattary saılaýy, aýdan ákimderi saılaýy ótti. Qazaqstanda jańa saıası mádenıet qalyptasyp keledi.
Sonymen qatar ekonomıka salasynda qurylymdyq ózgerister jasaý kerek. Ishki jalpy ónim óskenimen, sol ónimdi halyq arasyna ádiletti jetkizý, bólý problemasy bar. Jalpy, sheshimin kútken máseleler kóp. Qazirde ekonomıkalyq teńdik qalyptastyrý kezeńi júrip jatyr. Kelesi kezeń saıası reformalardy halyqtyń ál-aýqatyn arttyrý irgetasyna ulastyrý bolmaq.
Erlan SAIROV,
Májilis depýtaty
