Memleket basshysy suhbatta kóptiń kóńilinde júrgen biraz suraqqa jaýap berdi. Elimizde birqatar reforma júzege asyrylyp jatqanymen, kóptiń kóńilinde erteńge degen alańdaýshylyq bar ekeni belgili. Suhbattan syrtqa ketken kapıtaldy, buryn qabyldanǵan túrli surqııa sheshimderdi bir-eki jylda retke keltirýdiń ońaıǵa túspeıtinin túsindik. Prezıdent mundaı sharýalardyń júıeli túrde jasalý kerektigin, sebebi shuǵyl áreket ár kezde qatelikke uryndyryp, tipti keıde elimizge keletin sheteldik ınvestısııaǵa tosqaýyl bolý múmkindigin de eskertti.
Qańtar oqıǵasynan keıin Ata Zańnyń ústemdigin qamtamasyz etetin, konstıtýsııalyq baqylaýdy júzege asyratyn organ – Konstıtýsııalyq sot qaıta qalpyna keltirildi. Aýdan, qala ákimderi saılandy. Májilis jáne máslıhat depýtattary partııalyq jáne bir mandatty okrýgter arqyly saılandy. Búginde barsha halyq Májiliste demokratııalyq plıýralızmniń qalyptasqanyn baıqap otyr. Mundaı úrdis jalǵasyn tabýǵa tıis. Ekonomıkany ártaraptandyrý jáne monopolııadan aryltý, ınfraqurylymdy jańǵyrtý, bıznesti qoldaý jolyndaǵy jasap jatqan jumystar oń nátıjelerge jetkizbeı qoımaıdy. Prezıdent suhbatynan osyndaı oı túıdik.
Qańtar oqıǵasy boıynsha Prezıdent máseleniń tamyry tereńde jatqanyn, sol kezde jańa bılikke qyryn qaraǵandardyń kózdegenderi – memlekettik tóńkeris jasaý bolǵanyn ashyq aıtty. Halyqtyń áleýmettik jaǵdaıǵa narazylyǵyn paıdalanyp qalǵysy kelgen kúshterdiń aram pıǵyly iske aspady. Buǵan halqyna arqa súıegen Prezıdent jol bermedi. Endigi mindet – mundaı oqıǵalarǵa aldaǵy ýaqytta jol bermeý. Bul úshin halyqtyń ál-aýqatyn kóterýdi qamtamasyz etetin jańa ekonomıkalyq reformalar jasaý. Prezıdenttiń bul baǵyttaǵy ustanymdary da kóńilden shyqty. 2029 jylǵa qaraı ulttyq ekonomıkany eki ese arttyrý ońaılyqpen qol jetkizetin meje emes. Biraq alynbaıtyn qamal deýge de bolmaıdy. Buǵan elimizdiń áleýeti tolyq jetedi. Tek birlesken kúsh-jiger qajet.
Syrtqy saıasatta kórshi eldermen qarym-qatynas jaqsy jolmen damyp keledi. Alǵashynda kóbimiz tiksine qaraǵan Qytaımen aradaǵy vızasyz rejim álden-aq halqymyzǵa paıdaly ekeni baıqala bastady. Olardan bizge kelýshilerden góri bizden sol jaqqa baryp jatqandar legi kóp. Qytaı jaǵy 2024 jyldy «Qazaqstandyq týrızm jyly» dep ataǵan kórinedi. Muny barshamyz tıimdi paıdalana bilgenimiz jón. Ásirese jastarymyz álemdegi ozyq elderdiń biri sanalatyn Qytaı eline emin-erkin barsyn, kórsin, úırensin.
Biz dańǵazalyqqa, bos keýdelikke salynyp, tekten-tekke azyp-tozýǵa jol bermeýimiz kerek. «Malym – janymnyń sadaǵasy, janym – arymnyń sadaǵasy» degen qazaqtyń sózinde adaldyq, ádildik, eńbekqorlyq, biliktilik, birlik pen yntymaqtastyq jatyr. Jańarǵan jańa el qurý – bárimizdiń arman-múddemiz. Endeshe, eldikke uıysyp, jurt bolyp jumylý kerek.
Murat QAZAMBAEV,
qalalyq Ardagerler keńesiniń tóraǵasy
Jezqazǵan
