Foto: soltustikkaz.kz
Senattyń Áleýmettik-mádenı damý jáne ǵylym komıtetiniń tóraǵasy Nurtóre Júsip Oqý-aǵartý mınıstri Ǵanı Beısembaevpen kezdesti. Onda saladaǵy birqatar ózekti másele, onyń ishinde mektepke deıingi, orta, tehnıkalyq jáne kásiptik sapaly bilim berýdi qamtamasyz etý men balalar quqyqtaryn qorǵaýdyń mán-jaıy talqylandy.
Depýtat Senat basshylyǵy men depýtattar mektepterde oryn alǵan jaǵdaılarǵa alańdaýshylyq bildirip otyrǵanyn mınıstrlik jetekshisiniń nazaryna jetkizdi. Atap aıtqanda, oqýshylar arasyndaǵy qoqan-loqqy men qorqytý, jasóspirimder qylmysy, oqýshylar men muǵalimderdiń syrtqy qaterden qaýipsizdigi jáne t.b. máseleler týraly aıtyldy.
«Prezıdent Qasym-Jomart Toqaev ótken jyldyń qazan aıynda respýblıkalyq pedagogter sezine qatysqany barshaǵa belgili. Memleket basshysy óz sózinde mektepti eń qaýipsiz orynǵa aınaldyrý qajettigin atap ótken bolatyn. Senatorlar Prezıdenttiń tapsyrmasy men halyqtyń erik-jigerin sapaly oryndaý úshin Úkimet sizdiń mınıstrlik atynan qoldanystaǵy zańnamalyq aktiler men mektep mekemelerindegi qaýipsizdik sharalaryn túbegeıli qaıta qaraýy tıis dep sanaıdy. Qajet bolǵan jaǵdaıda mektepterdiń qaýipsizdigin qamtamasyz etý jónindegi keshendi sharalardy, onyń ishinde yqtımal qaýipterdiń aldyn alý, anyqtaý jáne jolyn kesýdi kózdeıtin tıisti qujattardy ázirleýdiń mańyzy zor», dedi Nurtóre Júsip.
Oqý-aǵartý mınıstri Ǵanı Bısembaev óz kezeginde sala boıynsha barlyq deńgeıde bilim alý úshin qajetti jaǵdaılar jasaýǵa, bilim berý júıesin damytýǵa, bilim berý salasyndaǵy tıisti normatıvtik-quqyqtyq aktilerdi jetildirýge baǵyttalǵan úzdiksiz jumystardyń atqarylý barysyn baıandap berdi.
