Foto: Ashyq derekkóz
Úkimet basshysy jylyna 70 myńǵa deıin kólik shyǵaratyn «Kia» avtomobıl zaýytynyń qurylysymen tanysty. Kásiporynnyń bas dırektory Kım De Kı zaýytta 1,5 myń jańa jumys orny ashylatynyn atap ótti. Bastapqy kezeńde «Sorento», «Sportage» jáne «Cerato» sııaqty shaǵyn torapty 3 model óndirisin jolǵa qoıý josparlanyp otyr. Zaýytty iske qosý 2025 jylǵa josparlanǵan.
Álıhan Smaıylov Úkimettiń ekonomıkany ártaraptandyrýǵa jáne óńdeý ónerkásibinde lokalızasııalaýdy tereńdetýge úlken kóńil bólip otyrǵanyn atap ótti.
«Biz koreıalyq áriptesterimizdi jáne Qazaqstanda osyndaı iri ınvestısııalyq jobanyń iske asyrylýyn quptaımyz. Meniń bilýimshe, bul Eýrazııa qurlyǵyndaǵy jalǵyz zaýyt. Bireýi AQSh-ta, ekinshisi osynda. Atalǵan zaýyttyń qýattylyǵyn eskersek, bul bizdiń respýblıka úshin óte mańyzdy joba», dedi Premer-mınıstr.
Premer-mınıstr odan keıin «Allur» zaýytynda «Chevrolet Onix» avtokóliginiń óndiristik josparymen tanysty. Allur kompanııalar toby dırektorlar keńesiniń tóraǵasy Andreı Lavrentevtiń aıtýynsha, zaýyt tolyǵymen ishki naryqqa baǵdarlanǵan jáne qoljetimdi baǵamen avtokólikter shyǵaratyn bolady. Serııalyq óndiris kólemi 30 myń birlik bolǵanda konveıer jylyna 400-den astam jańa jumys ornyn ashady.
Úkimet basshysy óńirde aýyl sharýashylyǵy tehnıkalaryn qurastyratyn, komponentter men qosalqy bólshekter shyǵaratyn «AgromashHoldıng KZ» lokalızasııa ortalyǵynda boldy. Búginde kásiporyn jylyna 1 myń kombaın, 3 myń traktor, 300-ge jýyq tuqym sepkish jáne 200 jınaýshy platforma shyǵara alady. Atap aıtqanda, ótken jyly qazaqstandyq dıqandardyń egis alqabyna 1 200-den astam traktor men kombaın jetkizildi.
Álıhan Smaıylov qazirgi tańda aýyl sharýashylyǵy mashınalaryn jasaý salasy joǵary ósý qarqynyn kórsetip otyrǵanyn atap ótti. Máselen, ótken jyl qorytyndysy boıynsha 6,4 myń astyq jınaıtyn kombaın men traktor shyǵaryldy, bul 2022 jylmen salystyrǵanda 20%-ǵa artyq.
Álıhan Smaıylov, sonymen qatar dándi-burshaqty daqyldardy óńdeıtin jańa kásiporyn «Kaıdzen» seriktestiginiń jumysymen tanysty. Sondaı-aq, «Aýyl amanaty» baǵdarlamasyna qatysyp jatqan Zarechnoe aýylynda turatyn otbasyǵa baryp, qatysýshynyń úı sharýashylyǵymen tanysady.
Úkimet basshysy odan keıin «Qostanai IT Hub» ortalyǵyna baryp, óńirdiń daryndy jastarymen kezdesedi.
