Mádenı is-sharany «Arqa» aıtys aqyndary men jyrshy-termeshiler mektebi uıymdastyryp otyr.
– Byltyr Kenesary babamyzdyń 220 jyldyǵyna oraı jyrshylar baıqaýyn ótkizgenbiz. Jas jyrshylarymyz Doskeı Álimbaıdyń «Han Kenesin», Nysanbaı jyraýdyń «Kenesary-Naýryzbaı» dastanyn jyrlaǵan edi. О́te joǵary deńgeıde óner kórsetti deı alamyz. Bıyl da Bóri batyrdyń urpaqtarymen birigip, Jáken Baıtýovtyń dastanyn nasıhat etip otyrmyz. Bul is-sharamyz arqyly aqyndy da, batyrdy da ulyqtaı aldyq, – deıdi aıtysker aqyn Aıtbaı Jumaǵulov.
Jyrshylar saıysyna óńirimizdegi otyzdan astam óren qatysyp, baqtaryn synady.
Jyrshy, professor Erbolat Shaldybekov Astanadan arnaıy kelip qatysyp, qazylar alqasyna tóraǵa boldy. Belgili professor saıystyń qorytyndy kezeńinde Arqadaǵy jas jyrshylardyń talabyna tańdanysyn bildirip, jyrshy-termeshiler mektebine sáttiligin tiledi.
Baıqaýǵa bas demeýshi bolǵan Aıan Qıynbekov áýletiniń atynan eki jylqy jáne Bóri batyr urpaqtary 1 mıllıon teńge qarajat bergen. Botaqara qosymsha bilim berý rýhanııat ortalyǵynyń oqýshysy Vıktorııa Alenına baıqaýdyń aspappen jyrlaý atalymynda qatarlastarynan basym túsip, bas báıgege, ıaǵnı júldege tigilgen jylqyǵa ıe boldy. Al dastandy mánerlep oqý atalymynda Qasym Amanjolov atyndaǵy balalar mýzyka mektebiniń oqýshysy Kámil Tileýqabyl ozyq shyǵyp, ekinshi jylqynyń ıesi atandy. Baıqaýǵa qatysqan basqa da júldeli oryn alǵan ónerli órenderge aqshalaı syılyq úlestirildi. Munymen qosa, oblystyq bilim basqarmasy aýyldyń úsh balasyna Kókshetaýdaǵy «Baldáýren» respýblıkalyq oqý-saýyqtyrý ortalyǵyna joldama tabystady.
«Alǵash ret at minip turmyn. Úıdegi ata-anam qatty qýanatyn boldy. Qazaq halqy qurmettilerge at mingizedi ǵoı. Sony jaqsy yrymǵa balap turmyn. Jyrshy-termeshiler saıysyna únemi qatysamyn. «Bóri batyr» dastanyn dombyramen oryndap berdim. Búgingi ónerim qazylar alqasynyń, kórermenderdiń kóńilinen shyqqanyna asa qýanyshtymyn», degen áserimen bólisti baıqaý jeńimpazy Vıktorııa Alenına.
Uıymdastyrýshylar urpaqqa rýhanı azyq, jyr dýman syılaǵan Bóri batyr urpaqtaryna alǵysyn jaýdyrdy. Bas demeýshi Aıan aqsaqal da aq batasyn jaýdyrdy.
– Biz babamyzdy osylaı ulyqtaıyq dep sheshtik. As pen toıdan góri osyndaı urpaqqa ıgiligi bar dúnıe jasaǵymyz keldi. Bóri babamyzdyń batyrlyǵy osy búldirshinderdiń boıyna darysyn! Is-sharany uıymdastyrǵan Aıtbaı Botpaıuly jáne Dıdar Qamı bastaǵan azamattarǵa erekshe rızamyn! – dep aq tileýin jetkizdi.
Qaraǵandy oblysy
